Khawvela kâwng tê ber

Khawvela kâwng tê ber
Kum 1999 khan Cathie Jung (USA), kum 62 mi chu Guinness World Records-in kawvela mihring damlai zinga kâwng (waist) tê berah a puang a, kum 26 hnuah, Cathie pawh kum 88 mi a ni tawh chung pawhin a record hi khum thei an la awm lo. Feet 5 leh inches 8 a sang, Cathie hian a kâwng bawr tih têt nan nitin darkar 23 chhung corset a ha thin niin an sawi a, corset ha chunga a kâwng len zawng hi inches 15 (38.1 cm) chauh a ni a, corset ha lovin inches 21 (53.34 cm) a ni ve thung.
Cathie hian tleirawl kum 18 mi a nih atangin corset hak a ching tan a, mahse, nitina hak a chin tanna chu kum 30 a pelh hnuah chauh a ni. A tira a kawng len zawng chu inches 26 a ni a, a corset hak than avangin a kawng hi a tê ta telh telh a, a kawng tih tet nan hian inzai (surgical intervention) lam chi engmah a ti lo a, ei leh in lamah pawh eng ‘special diet’ mah a ei bik lo a, a kawng tih tet nana exercise lak dan bik riau pawh a nei chuang lo. Victorian fashion a tuipui a, a corset hak chu a kawng ti têtu a nih thu a sawi.
Hetiang taka a kawng a tet avang hian taksa hriselna lamah insawisel phahna a neih awm a hre lo a, in chhung chet leh sekrek khawih bakah a nitin nunphunga tih tur tul te engmah a bahlah phah lo niin a sawi bawk.