Khawvela marathon runner upa ber su hlumtu car hre tawh

Khawvela marathon runner upa ber su hlumtu car hre tawh
Punjab-a Jalandhar-Pathankot highway-a khawvela marathon intlansiaka tel thei upa ber, kum 114 mi, Fauja Singh-a su hluma tlan chhe zui ta lirthei chu a sut atanga darkar 24 dawn liam hnuah hriat chhuah a ni tawh tih police-in an sawi.
CCTV footage an enna atangin Punjab registration number intarna Toyota Fortuner, mi sua tlan chhe zui ta khalhtu hi an la zawng zui thung tih police chuan an sawi.
Singh su hlumtu zawng hian team eng emaw zat insiama inzar pharh a ni a. Na taka a inhliam hnuah damdawi inah lak niin a thi zui a ni.
‘Turbaned Tornado’ tia sawi mai thin, Singh-a hi khawvel puma hriat hlawh niin April 1, 1911-a puang a ni a, indopui vawi hnih, hripui leng vawi hnih leh kum 1947-a India ram then a paltlang vek a ni.
Kum 1990 chhovah khan England-ah a fapate zinga pakhat bula cheng turin a kal a. A fapa, Kuldip leh a nupui an thih leh hnuah kir lehin India-ah a awm zui leh ta a ni.
Kum 2000-a kum 89 a nih khan a vawi khat nan khawvel hriat hlawh intlansiakna, London Marathon-ah inlanin khawvel hmel hriat a hlawh tan a. Hemi hnuah hian Toronto, New York leh khawpui dang dangah kum bithliahah a tel zui ta zel a ni.
2004 Athens Games leh 2012 London Olympics-ah khan meichher kengtu zingah a tel a, infiamna bungraw siamtu brand hriat hlawh tak takin David Beckham leh Muhammad Ali te ang maiin an thil siam faktu atan an lo hmang tawh thin.
Kum 2012 khan Malaysia chuan 2nd Annual Chardikala Run buatsaihin thupui (theme) atan ‘101 and running’ tih an hmang a. He intlansiak hi Singh-a hlawhtlinna chan puala a siam niin BrandLaureate Award hlan a ni bawk.
Kum 2013 khan Hong Kong Marathon-ah telin darkar 1, minute 32 leh second 28-ah a tlan thleng a. Hemi hnu, kum 102 a tlinin intlansiak a chawlhsan zui a; mahse, mi tanpuina tur thil angah chuan a la tlan fo tho.
A thih hian infiamna huang leh politics-a mi langsar tak takten an ui thu an sawi nghal hlawm.
Prime Minister Narendra Modi-a chuan, “Fauja Singh-a hi mihring danglam bik leh India-a thalaite an taksa fit tura fuihtu a nih angin mi ropui bik a ni a. A tumruhna avangin infiammi hriat hlawh a ni a, a thi ta hi a lungchhiatthlak tak zet a. A chhungte leh khawvel puma amah uitute ka tawrhpui tak zet a ni,” a ti.
Congress President Mallikarjun Kharge-a pawhin, “Centenarian marathon legend, ‘Turbaned Tornado’ tia khawvelin a hriat, Pu Fauja Singh-a a thi hi a pawi ka ti tak zet a. A nun, tunrumna leh chhel taka a beihnain mi hnenah taksa fit that pawimawhna a thlen a, infiammi, thalai leh upa zawkte pawh amah ang ni turin a fuih a ni,” a ti.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More