Khawvela milar sam kawl hnem ber

Khawvela milar sam kawl hnem ber
Thil chi hrang hrang atchilh chi hi an awm ve a, Connecticut, USA-a cheng, John Reznikoff pawh hi chung zingah chuan telin, khawvel miropui leh milarte sam lakkawm lamah a tui tlat mai a, Abraham Lincoln, Marilyn Monroe leh Elvis Presley te thlengin an sam a lakhawm, a kawl tha raih mai a ni.
John hian archives puitham tak mai Connecticut-ah hian a nei a, amah hi expert leh authenticator a ni nghal a, ama pualin heti lama sumdawnna University Archives a nei a, Guinness World Records-in kawvela miropui leh milarte sam lakhawm hnem berah a puang a, John F. Kennedy, Albert Einstein, Napoleon, King Charles I leh Charles Dickens te sam pawh a archives-ah hian a awm a, miropui leh milarte chi hrang hrang te sam a lakhawm tawh a, a sam lakkhawm te hi dollar maktaduai tel man ni tawhin an chhut sak a ni.
Hetianga miropui leh milarte sam, kum tam tak kal tawha mite pawh a neih theih dan an zawh chuan, “Victorian tradition kha a ni ve pakhat a, kum 100 chuang kaltaah kha chuan tu emaw in khuaah a rawn zin a, entirnan Robert E. Lee te lo ni ta se, tunlai angin a autograph an dil ve ngai lo, a sam zai tlem an lo dil ang. Chutiang hunah chuan tu emaw chemte emaw bakcheh emaw keng a bul hnaiah an lo awm ang a, a sam zai tlem a tan ang a, chu chu a pe ang. Chutiang chu tuna ka sam lakkhawm thenkhat te hi a lo awm theih dan chu a ni. A vai vai chuan hetiang hi a ni vek lo a, thenkhat chu hei aia mak zawk te pawh a awm,” a ti.
US President hlui Abraham Lincoln-a sam a neih thei chu a sam collection-ah pawh a chhuan ber te zinga mi niin a sawi a, “A sam tak tak a ni a, ka kawl theih dan pawh hi a mak khawp a, an kahhlum zan, April ni 14, 1865 ami kha niin, amah zaitu surgeon kut atanga a fapain a dawn, chuta tanga chhungkua an inhlanchhawn tak zel niin, a tawpah ka kutah a rawn awm ve ta nawlh mai a ni,” a ti.
A sam collection zinga sawihlawh tak pakhat chu Adolf Hitler-a nupui Eva Braun sam a ni a, John chuan, “Hun rei tak chhung kha chu mitha lo ni a ka hriatte sam chu ka kawltha ve duh lo a, history-a a tha zawnga hming lang te sam chauh ka duh a. Hetiang ngaihtuahna ka neihna chhan pawh John Wilkes Boot (Lincoln-a kaphlumtu) samzai kha lei ka tum a, a man thuah leh thil dangah kan inberem thei lo a, khata tang khan mitha lote sam chu lakhawm ve lo ang, ka ti ta a ni,” a ti a, “Mahse, he samzai ngei mai hi kum ruk kum sarih hnu velah ka hnen a rawn thleng leh ta lawi si a, anni ang chi te pawh ka collection-ah ka telh leh ta zawk a ni,” a ti.
John chuan mitthi tawh te sam chauh a lak khawm tawh thu sawiin, astronaut Neil Armstrong-a sam chu a lumettu hnen atangin dollar 3,000-in a lei a, hei vang hian a buaiphah khawp mai a, Armstrong-a damlai thil thleng kha a ni a, Armstrong-a ngaihdan a ni lo a, court lamah an thleng deuh thuak thuak a, an inrem leh thei ta a ni.
John hian a samzai lakkhawm hi eng emaw chang chuan a hralh ve leh zauh thin a, a hralhto ber chu Elvis Presley samzai niin, 2002 khan dollar 1,15,120-in a leitu hmingthup hnenah a hralh a ni.