KHAWVELAH REMNA LALIN SAWRKARNA A CHANG TAWH EM?
Rev. Dr. Zaichhâwna Hlâwndo
Zawlnei Isaia hnenah, lei leh van siamtu Lalpa Pathianin khawvela a lo kal tur thu leh a lo kal chhan tur chu a lo kal hma kum 700 khan a lo hriattir lawk a. Isaia 9:6-7 ah chuan…
Kan tan naupang a lo piang a, fapa pêkin kan awm ta a: rorêlna (Sawrkarna) chu a kokiah a chuang ang a: a hmingah chuan, Maka, Remruattua, Pathian Chaka, Chatuan Pa, Remna Lal an ti dawn si a. A lal ram a zau zel ang a, a lal ramah chuan remnain tawpintai a nei lo vang; Davida lalthutthlengah a thu ang a, dik tak leh fal takin rorêlin a rawn tinghet ang, tun atanga kumkhuain, Sipaihote Lalpa thahnemngaihna chuan chung chu a ti ang.
Krismas sermon thupui lar berte zinga mi chu ‘Remna Lal’ tih hi a ni hial awm e. Kan Lalpa Pathian khawvel a lo kal atanga chhiarin kum 2025-na kan hmang zo leh tep tawh chu a ni a. Khawvel khawi ramah mah remnain tawpintai nei lo sawrkarna chu a la din hriat a ni lo. Chuti a nih chuan remna lal lo pianga khan leiah remthu len tir kha a lo kal chhan ber niin a lang bawk si. Van mipuite meuh pawh khan “Chungnung berah Pathian ropui takin awm rawh se; ‘Lei chunga a lawm em em mihringte hnenah remthu leng rawh se’ (Luka 2:14) tiin an rawn thlah kha a ni a. Davida lal thutphahah a thu ang a, dik tak leh fel takin rorelna a rawn tinghet ang tih a ni bawk si.
Zawlnei Isaia hnenah Lalpan eng thu chiah nge a hriattir? Pathian fapa Isua Krista khawvela a lo kal chhan ber chu eng nge ni ta? tih hi zir chian a tul khawp mai. Mihringte hnena rem thu lentir a ngaihna chhan pawh hi chhui chian a tul. Mi tam berin kan ngaihtuah danah chuan Evi leh Adama bawhchhiatna avanga khawvel chhandam leh tura lo kal angin kan ngai a, a dikna chen pawh a awm tho mai. Amaherawhchu ngun taka Zawlnei Isaia Bung 9 pum han chhiar hian a hnam thlan Israel fate sualna avanga Pathian thinurna leh phuba lakna tur thute a awm a. Mahse hmangaih Pathian chuan a hnam thlan Israel fate a mâk tawh hnute nena rem thu siam leh tura lo kal a nih tih a chiang hle. Israel hnam 10 te zinga hnam 2 Napthali leh Zebulun te nihlawh leh tur thute pawh a tel. Isaia hun lai hian Israel hnam 12 te chu an phel phawk a. Chhim leh Hmar ah inthenin lal ram pahnih a piang a nih kha. Hmar lam lal Jeroboaman milem pathian Sebawng lim siamin a mite a biak tir avangin Lalpa thinur vawrtawp an tawng baw ta a nih kha.
A sawi lawk ang ngeiin khawvelah a lo kal a, Judai ram Bethlehem khuaah a lo piang a. A lo kal laia awm ve lo, Israel hnam 10 khawvela bo darh vekte kha a vei ber an nih avangin a zirtirte pawh kha Jentail te kawngah kal lo tur leh Samaria khua lut lo lova, Israel hnam beram bote hnena kal turin a tir a nih kha. Matthaia 10:5-6 -Chung sawm leh pahnih chu Isuan a tir chhuak a, an hnenah heti hian thu a pe a: “Jentailte kawngah kal suh ula, Samari mite khua reng rengah pawh lut suh ang che u; amaherawhchu Israel hnam beram bote hnenah chuan kal zawk ang che u.” tiin thu a pe. Kanan hmeichhe nu hnenah pawh khan chiang takin Israel hnam 10 bo tate tana khawvela lo kal a nih thu kha a sawi a nih kha. Matthaia 15:24 Ani erawh chuan, “Israel hnam beram bo hnenah lo chuan tirh ka ni lo ve,” a ti a, a chhang a.” Heng thu ama sawi ngei atangte hian Lal Isua khawvela a lo kal chhan bulpui ber chu a hnam thlan Israel a mâk tawh leh khawvela darh vekte tana nun hlan turin a ni tih a chiang khawp mai.
Israel faten an nghahhlelh ber chu Mesia lo kal hunah khawvelah hian ro a rel dawn a ni tih hi a ni. Chu chu Isaia a lo puan lawk tir kha a ni tlat bawk si. Mahse Pathianin Israel fate chauh lo pawh Jentailte tan pawh a fa nih theihna kawng a rawn hawn thar leh phawt a ngai a. Thuthlung thar, tuma tihdanglam emaw sut theih tawh loh turin ama thisenin a rawn din thar leh ta a ni. Tichuan a hnam thlante Kross thisen hmanga a zawn chhuah kim hunah Israel te ram thar a pe dawn a, chutah ngei chuan remnain tawpintai nei lo tur a Lal Ram Sawrkar chu a din tawh dawn a ni.
Isua Krista vana a lawn hma khan leia a Lal ram din theihna turin khawvel zawng zawngah thuthlung thar chanchintha hril turin a zirtirte a tir chhuak a. |awngtai dan tur pawh uluk takin a chah thlap a. Matthaia 6:9-10 “Chutichuan, nangni chuan hetiang hian tawngtai rawh u :- ‘Kan Pa vana mi, I hming zahawm rawh se. I lal ram lo thleng rawh se. I duhzawng vana an tih angin leia mi’n ti rawh se. He leiah ngei hian a Lal ram chu din a tum a ni tih a chiang hle. Vana miten a duh zawng an tih anga leia miten kan tih hun hi ala awm dawn a ni. Amah ngeiin Isaia hnena a lo puan lawktir tawh ang khan “Sawrkarna chu a kokiah a chuang ang a. A lal ram a zau zel ang a, a Lal ramah chuan remnain tawpintai a nei dawn lo a ni.”
Khawvelah remna Lalin sawrkarna a din hun hi a hla vak tawh lo niin a lang. Khawvel Kristian ram muthlute an harh chhuak leh ta a. America, Australia, Europe ram United Kingdom leh ram hrang hrang kawtthlerah te chuan ‘Isua hi Lal a ni, Kan ram hi Kristian ram a ni’ tia au rualin kawng an zawh ta luih luih mai. Zofate zingah pawh hnam lirpui a nghing mêk a, mipuite pawh rorelna dik duhin kan tuihal tan ta! I Lal Ram lo thleng rawh se, tia kan tawngtaina hi a taka a lo thlen a, Sawrkarna a kokiah a chuan theih nan Krismas dik tak hmang turin mi tinte i in buatsaih ang u.