Khawvelin India hmasawn a hlawkpui – EU president

European Commission President Ursula von der Leyen-i chuan European Council President Antonio Costa-a nen Thawhtannia India Republic Day lawmnaah khual lian an nih hnuah India hlawhtling chuan khawvel hi nghet, thang duang leh him zawkin a siam dawn tih a sawi a, chu chu mi tinin an hlawkpui niin a sawi.
Von der Leyen-i hian social media-ah India leh EU tang dun chu ‘khawvel ruhrel’ siam remna pawimawh a nih thu a tar lang a. Costa-a nena khual lian an nih chu ‘a nuna chawimawina ropui ber pakhat’ a nih thu a tar lang bawk.
“India hlawhtling hian khawel hi nghet, thang duang leh himin a siam a. Mi tinin a hlawkna kan tel a ni,” a ti.
Prime Minister Narendra Modi-a pawhin India-EU chu kawng hrang hrangah inkungkaihin thawhhona thuk zawk a nei zel dawn tih a sawi.
Tun hi India-in ram tangruala hruaitute Republic Day lawmnaa a sawm vawi hnihna niin kum 2018 khan Asean hruaitute an lo tel tawh.
Thawhlehni khan EU hruaitute hian Modi-a hovin India-EU Summit telpuiin hetah hian sumdawnna leh himna thila US-a Donald Trump-a sorkarin kal dan hrang hrang a neihin nghawng a neih karah sumdawnna thila thawhhona tur an ziak nghe nghe.
Modi-a chuan Costa leh Von der Leyen-iten Republic Day lawmna an telpui chu lawmawm a tih thu social media-ah tar langin, “An lo tel hian India-EU inkungkaihna leh kan hlutna inpe tawn turin thuk zawkin min pui,” a ti a. “An lo tlawh hian India leh Europe chu kawng hrang hrangah zau zawka kan thawhho zelna tur a siam,” a ti bawk.
Republic Day lawmna parade-ah khan EU military staff leh EU naval operation pahnih, Atalanta leh Aspides an inlan a, Europe pawna an inlan hmasak ber a ni nghe nghe a. Von der Leyen-i chuan EU military staff leh maritime mission flag chu ‘himna atana kan tanhona thukzia lantirna’ tiin a sawi.
Costa leh Von der Leyen-i hi President Droupadi Murmu-i’n Rashtrapati Bhavan-a ‘At Home’ reception a thlenah an tel zui bawk.
EU hruaitute leh India hian Thawhlehni khan sumit-ah free trade agreement ziakin Security & Defence Partnership an peih fel bawk a. Ram venhimna leh technology-a an thawhhona tur, Security of Information Agreement tur an sawiho bawk.
Von der Leyen-i hian kar hmasak khan India leh EU inremna ziah tur chu mi tluklehdingawn hnih tan sumdawnna hawnna tur a nih thu leh hei hi khawvel pum sum thawh chhuah hmun lia thena hmun khat dawn tling a nih thu a lo sawi tawh bawk.
EU leh India hian FTA nei tur hian kum 2007 khan an indawr tan a, kum 2013 khan tawpsanin an ngawi zui ta vang vang a. June, 2022 atang khan indawr lehin nikum kum tawpa ziah fel hman kha an tum a; mahse, Trump-a sorkarin sumdawnnaa chhiah lak zat bi thar a siam chuan a tikhawtlai ta hret a ni.