Khawzawl DC office hawng

Khawzawl Deputy Commissioner office buiding thar leh district hriatrengna lungphun chu Thawhtanni khan hawn a ni. A hawngtu deputy chief minister Tawnluia chuan Khawzawl district lungphunah Mizo lal leh pasaltha huaisen, kumpinu sawrkar laka zalennna sualtute chanchin tarlan a ni chu lawmawm a tih thu a sawi a. Mizo hnam thinlung chawisang zeltu ni thei se a duh tih a sawi. District hmuh theih nana thawktu hmasate chu chibai a buk tih sawiin, district chuan mipui rilru tilawmin, hmalam pana hma sawn zel turin tumruhna leh taimakna rilru a pe tih a sawi a ni.
Deputy CM sawi danin, Khawzawl district-ah sawrkar office 24 dah a ni tawh a. Revenue office tih changtlun niin, District Local Administration Office leh District Transport Office bun chu hmachhawp a ni. District Hospital pawh DoNER ministry chuan khum 50 awmna turin a pawm (approve) tawh a, specialist doctor-in damdawi in an thutchilh theih nan post siam (create) a ni tawh.
Khawzawl DC office building thar hi Special Assistance to State for Capital Expenditure (SASCE) 2020- 2021 hnuaia sum hmuh cheng nuai 1000 hmanga sak a ni a. Zopa chhiara chhawng lia sang a ni.
Khawzawl district hriatrengna lungphun hi DC office thar kawtah phun a ni a. Hawlh tlangin (diameter) feet 12 a sei, feet 15 a sang a ni. Lungphun hi chhawng hnih – a hnuai hmai li leh a chung kil thum neia siam niin, a hnuaiah hian Mizo leh Sap tawngin Khawzawl khaw pianchhuah dan, rambuai lai chanchin leh district a nih chhoh dan ziah a ni; Khawzawl district chhunga Kumpinu sawrkar laka zalenna sualtute – Laburha Sailo, Nikuala Zahau, Kairuma Sailo, Sangtonga, Pakulha, Taibeha, Sama Mawnga te chanchin ziah a ni a. A chung kil thumah hian – Mizo, Sap leh Hindi-in ‘Khawzawl District Hriatrengna Lungphun’ tih leh district function tan ni (12.08.2019) ziah a ni. Lungphun hi Rs. 455000 senga siam niin, granite phek 14-ah thumal 4000 chuang ziah a ni.
Khawzawl BDO leh DUDO office buatsaihin self help group-te inphochhuah siamsak an ni.