Khehpuam an uar tawh lo!

Kum 10 chuang liam taah khan khehpuam a lar a, hausakpui thut pawh hmun hrang hrang hrangah an awm. A reh telh telh a, tunah phei chuan hausak thut tumte pawhin an bawh ta vak lo niin a lang.
Damdawi chi khat pseudoephedrine a awm a, chu chu phai atanga lain khawchhak lamah an tawlh thin. Tlawm tea lak, to taka hralh a ni a, hlawk uchuakah ngaih a ni. Chu chu khehpuam tia sawi a ni a, 2012 leh 2013 velah kha chuan titi a tling.
Khehpuam hi man tur chu a la awm a, mahse a hma ang a ni tawh lo. A nasa tawh lo a, an man pawhin tam tham a ni tawh lo. Kum liam ta 2025-ah khan Mizoram Excise & Narcotics (MEN) department-in kg 7.420 an man a, a vanglai a ni ta lo!
Khehpuam hi 2011 vela ri hluai a ni a, 2011 hi MEN department-in an man tan kum niin, khami kumah khan kg 1014.016 an man.
A kum lehah an man hnem a, kg 3742.022 an man. 2013-ah kg 2268.417 an man leh. MEN department chhinchhiahna enin, 2011 atanga 2013 thleng khan an man nasa a, khang lai kha a vanglai pawh a ni awm e.
2014-ah kg 287.495 an man a, 2015-ah kg 109.515, 2016-ah kg 206.040, 2017-ah kg 19.137, 2018-ah kg 125 an man. An man tlem telh telh a, 2019-a kg 90.690 an man hnuah 2020 leh 2021-ah an man ta lo. 2022-ah kg 29.530 an man leh a, a tlem ta. 2023-ah phei chuan kum tluana an man hi kg 5.943 chauh a ni tawh. 2024-ah an man lo.
Pseudoephedrine hi thil zang tak mai a ni a, kg 1000 te chu tam tham tak a ni. A kg zawng chuan kg 1 pawh a tam a, 2025-a an man pawh hi dah khawm chuan a tam ang.
Khehpuam man tur a hma anga a tam tak lo chhan hi chiang faka hriat a ni lo.