Khelh hniha la chak ve ve Liverpool

On Aug 27, 2025 3 0

Khelh hniha la chak ve ve Liverpool
Defending Premier League champion Liverpool chuan Thawhtanni zan league match awmchhunah hun pekbelh minute 10 ral hma chiaha chakna goal khungin Newcastle United mualah point thum an thawkchhuak leh a, ti hian, season thar bultanna inkhel hmasa vawi hnihah hnehna chang ve vein, point ruk nen table-ah pathumna an luah.
St. James’ Park mipui 52,230 hmaa 3-2-a Reds chakna goal kha minute 100-na chiaha rawlthar Rio Chima Ngumoh tihluh niin, kum 16 leh ni 361-a upa ni chunga Anfield club chakna goal a thun hmangin English attacking midfielder khan history thar a siam a, Liverpool club history-a goal thun thei naupang ber a nih bakah Premier League history-a goal khung thei naupan lama a palina a ni a, a aia goal khung thei naupang zawk awmchhunte chu James Vaughan, James Milner leh Wayne Rooney-te chiah kha an ni.
He mihang substitute Ngumoha hian 2-2 ni chunga inkhel tawp mai tawh tura ngaihah hun pekbelh minute 11-a minute 10-na a zawh hma chiahin Anfield club tana goal khung thei naupangber a nihna goal a hlawhchhuak ta a ni.
He inkhela goal hmasaber leh Liverpool hmahruaina goal ni bawk hi chawlhlawk hma minute 10 la awma Ryan Gravenberch tihluh niin, kha goal kha April 2024 hnu lama a goal thun leh hmasakber a ni zui ta nghe nghe.
Second half-a mualneitu team erlet tur tikhaihlaktu a nih hlauhawm takin first-half hun pekbelhah Magpies English winger Anthony Gordon hnawhchhuah niin, Virgil van Dijk laka a chet dan rum tak avangin referee Simon Hooper chuan red card a hmuh a, video assistant referee (VAR) check hnuah pawh nemngheh zui a ni.
A tam zawk ni chunga second half bul tan tih takah French striker Hugo Ekitike chuan minute 47-ah sihnih faia mikhual team hmahruaina thawh ve lehin, player pakhata kim lo chung leh 2-0 laia an hnufual hman chunga Newcastle erlet tak hi a pui chho ta a ni!
Minute 57-ah Bruno Guimaraes chuan home team siphurh pakhat zawk sut thenin, heti chinah hian an la duhtawk hauh lo a, mualneitu an nihna hre renga goal nawr zui zelin, hun pangngai tawp hma minute hnih chuah awm tawhah substitute Will Osula chuan St James’ Park chhunga Toon Army sapataltir turin Newcastle siphurh sut zawhna goal a khung a, champion lai laka point khat hlawhchhuak mai tawh tura ngaih an nih hnu hun tawp dawn tak takah Liverpool mihang rawltharin history siamin away team chakna goal a thun nawlh a, Eddie Howe leh a naute’n uiawm takin point an hloh.