Khello India Taekwondo ah Gold medal leh Silver

March ni 9-11, 2024 chhunga Cuttack, Odhisa-a 1st National Khelo India Women’s Taekwondo League: 2023-24 khelh zawh takah khan Vanlalthlamuanpuii (Nupuii) chuan Under – 59 Kg Cadet huangah gold medal a la a; Under – 52 Kg Junior inelna atangin Ramdingliani’n bronze medal a awrh ve bawk.
National Khelo India Womens League khel thei tur hian zone inelna paltlang zet a ngai a; India ram pum hi North, South leh West Zone-a then niin, he’ng zone tinte hian inelna huaihawtin, chu ta medalist chinte chu national khel tur hian an qualify ta a ni.
North Zone atang hian Mizo naupang pathum leh West Zone atangin an tling a, chu’ng Mizo boxer-te chu Vanlalthlamuanpuii (Zemabawk), Ramdingliani (Chanmari West), PC Lalduhawmi (Ramthar North) leh R. Lalbiaknuami (Chaltlang)-te an ni.
Nupuii (gold) leh Ramdingliani (bronze) bakah hian PC Lalduhawmi leh R. Lalbiaknuamite chu medal la pha lo zawngin quarter-final lamah an tlawm.
Mizoram aiawhte hi coach Lalinpuia (Armed Veng South) hoa fehchhuak niin,
Exodus School Taekwondo Club zirlai Vanlalthlamuanpuii hian gold medal a sualchhuahna kawng quarter-final bout-ah 5-1, 14-1-in Maharastra boxer a hneh a; semi-final lamah UP aiawh chu 5-4, 9-1-in a paltlang a, final-ah 9-2, 10-1-in Manipur boxer ngei mai sawp chungin gold a hlawhchhuak ta a ni.
TABF atanga zir chhuak Ramdingliani kutah bronze lut ve thungin, NCOE Lucknow-a awm mek Dingi hian quarter-final lamah Bihar aiawh chu 12-0, 14-2 tehrengin a sawp zet a, semi-final bout-ah Manipur boxer nen deciding khelh ngaiin khawpin an inhnehtawk a, chu tah 7-3, 2-3, 3-12-a tlawmin bronze medal a lungawipui mai a ngai ta a ni.