A khup veilama hliam serious zet avangin kum khat chuang a inkhelh theih tawh loh hnuah Brazil forward Neymar chuan a club vawn lai Al-Hilal tan khelmual a lut leh thei ta a, Asian Champions League match pakhata 5-4-a UAE Pro League club Al-Ain an hnehna inkhel tawp hma minute 77-ah bench atangin a tlanlut a, harsatna lian tawk loin a khel tluan thei.
Brazilian kum 32 mi hian nikum October ni 17 khan 2026 World Cup qualifier-a Uruguay leh Brazil inkhelh tumin hliam a tuar a, November thlaah zai niin, khelmual lamah hmuh tur a awm lo zui ta ngat ngat a, a inhliam atanga kum khat a chuan hlek hnuah nghakhlel taka ngak ngat ngattu Arab team tan a inlan leh thei ta hram a ni.
Brazil mipate zinga ram tana goal khung hnem ber ni mek Neymar hian khelmuala a kirleh zanah goal khung theihna hun remchang neiin, Al-Hilal counter-attack pui tak hmangin a hlauhawm hman thuak a, mahse, Al-Ain lamin an ball hlauh an changlet a, hun tawp lamah goal khat an thun zui leh ta bawk.
Neymar hian August 2023 khan Paris St-Germain chhuahsanin Saudi Arabia a pan a, a man zat chiah hi tarlan ni lo mah se euro maktaduai 90 (£77.6m) niin media lamin an chhuah hlawm.
PSG-a a season hnuhnung lamah pawh khan hliam avangin a talbuai fo a; Arab team a zawm hnuah a zualzapui vailenhlo tih ang mai kha a ni a, nikuma a inhliam hma thleng khan Al-Hilal tan vawinga chiah a khel tling!
Khelmualah Neymar kan hmu leh ta!
Get real time updates directly on you device, subscribe now.
Prev Post
Next Post