Khelo India thlen tur thlirlawk

Mizoramin tun thla (February) a a thlen tur Khelo India University 2024 atana inbuatsaihna chu Nilaini khan Sports minister Lalnghinglova Hmar hoin thlir ho a ni.
Minister chuan national level sports promotion program pawimawh tak Mizoramin a thleng dawn tih sawiin, event liantham tak leh hautak angreng si hi a huphurh ang zawnga la loin, chonaa laa hmachhawn turin department hotute a fuih. Tun tuma Khelo India University Football hi Mizoramin sports event liantham zawk a dawn leh hun atana inpuahchahna tha tak a ni tih a sawi bawk.
Sports & Youth Services director Lalnunhlua chuan department hrang hrang mawhphurhna insem dan leh thil tul dang a report a. Sawihoin hma lak dan tur rel a ni.
Mizoram hian football segment bikah university hrang hrang football team 8 chu February 19-29 chhung a mikhual dawn a. Inkhelhna, thlenna tur leh a kaihhnawih danga inbuatsaih leh a bak mawhphurhna dang chu Sports department leh department dang ten an insem dawn a ni.