“Khualzinmite hipna tur”

Tunhnai khan tourism minister hovin khualzinmite hip luh tam dan tur chungchang relin tourism department bakah a kaihhnawih department dang heng – Art & Culture, I&PR, Land Revenue & Settlement leh Planning & Programme Implementation aiawhte an thukhawm a. Khualzinmite hip luh dan tur ngaihtuahtu tur – “Mizoram Heritage & Tourism Development Committee” din an rel a.
Khualzinmite hipna hmanrua atan lemziak mite kutchhuak (art) leh hmanlai pipute khawsak thinna hmun hlui (heritage site) te chawisan leh vawnhim hi tourism chawikanna atana hmanraw tangkai, kan buaipui ngei ngei tur chu a ni tehmeuh mai. Chutih rualin, siam chawp ni lo, Khuarel thil mawi leh hlu em em — sik leh sa nuam, boruak thianghlim leh ram hring (tlangram) leh phul hmun tha tak tak kan neihsate hi khualzinmite hiptu ber niin a lang zawk a. Khuarel mawina kan neih hlu tak takte hi, khualzinmiten zalen, nuam leh hahdam taka an tlawh theih tura ruahman hi Mizoram tan chuan khualzinmite hip luhna hmanraw tha leh tangkai ber tur a nih a rinawm.
Mizoram hian khawvel emaw, India emaw, India hmarchhak emaw huapa hriat hlawh khawpa ropui leh lar, hla tak atang pawha Mizoram an rawn tlawh vang vang chhan ni thei tur khawpa heritage sites ropui hi kan nei hran lo niin a lang a. Khualzinmite an lo kal takah chuan, kan ramin tlawh tlak nia kan neih hmunte hi chu kan lo kawhhmuh a ngai a ni ve mai a, hmun danga thil ropui tak tak ang a ni pha lo a, kan hnam tana a hlutna kha min rawn witness ve a ni lek fang a. Khualzinmiten min rawn tlawh chak chhan ber tur chu, sawi leh sawi hnu, sik leh sa, boruak thengthaw nuam, thil siamna factory khawl khu rimchhia leh bawlhhlawhin a chim buai ve lohna ram hi, rawn hmuh leh rawn chen an duh leh chak ber a ni dawn tih a chiang a ni.
Chuti a nih chuan, heng Khuarel mawina hlu tak kan neih mekte hi tha zawka humhalh a, khualzinmiten awlsam leh nuamsa taka an tlawh ve theih tura ruahman hi tourism promote-na tura kan tihtur hmasa ber chu a nih hmel ta a ni. Mizoram tourism hmasawnna tur ngaihtuahtu Mizoram Tourism Development Authority (MTDA) te pawh kan nei thin kha a ni a, an hmalakna hi phochhuah tur a awm vak lo nge, an thawm hi hriat tur a tam lo hle niin a lang.
Tourism pawimawhna hi ram hruaitute pawhin Assembly House chhungah hahipin an sawi thin, a pawimawhna leh Mizoram state economy chawisanna hmanrua tha ber nia sawi thin hi, a taka tihhlawhtlinna tur kawngah beihpui kan thlak a ngai hle a ni.