Khuarel chhiatna tuarte pui

March 31 leh April 1-a thli leh ruah thawkin Khawzawl district-ah chenna in, biak in, ran in leh bungraw dang engemawzat a tichhia a. Hriat theih chinah thli leh ruah avanga chhiatna thleng 148 a awm. Chhiatna thlen hnu hian bawrhsap K Lalrohlua hoin chhiattawkte chhawmdawl dan tur ruahman nghal a ni a, Ningani atang khan vanduaina tawkte hnenah tanpuina pek chhuah tan a ni.
Tanpuina sem dan tur hi bawrhsap hoin a hnuaia officer-te leh Disaster Management & Rehabilitation (DM&R) zonal officer ten an rel a. Vanduaina tawk chhungkuate hnenah State Disaster Response Fund (SDRF) inkaihhruaina danin a sawi angin, tanpuina hi pek a ni. Khawzawl DC office-in tanpuina tur sum a neih bak hi Mizoram sawrkar chuan DM&R department kaltlangin a pek belh dawn tih sawi a ni.
Bawrhsap chuan an district-a khaw hrang hranga chhiatna tawkte tan tanpuina pek nghal char char a ni, tiin, bank account leh Aadhar card number thehlut tawhte hnenah pek chhuah hmasak a ni a. Tanpuina la dawng lote pawh an Aadhar card leh bank account number an thehluh fel hunah tanpuina an pek nghal thuai tur thu sawi a ni.
Tanpuina sumfai pek chhuah bakah hian zonal officer-ten an bial chhung theuha chhiatna tawkte pualin silpauline an lo semchhuak tawh a. Khawzawl bawrhsap chuan thli leh ruahin in chung a tih chhiat sakte rangva mamawh dan lakhawmin, sawrkarin a hriattir angin rangva mamawh dan hi sawrkar hnenah thlen a ni tawh a, reiloteah rangva hi sem chhuah theih beisei a ni tih a sawi.