Cyclone Remal thlipui leh ruahpui thawk chuan Mizoram dung leh vangah chhiatna nasa tak a thlen a. Ruah a tam avangin hmun hrang hrangah inkalpawhna kawng a tawp a, leimin-in chenna in a hnawl avangin chhungkua kuaa thihna rapthlak tak a thleng a, hliam tuar tam tak an awm a, chenna in tam tak a chhia a, thlanmual te a chim a, tuilianin chenna in tam tak chim chhiain thlai chinna huan tam tak a chhe bawk a. Sawrkar, pawl hrang hrang leh mimal tlawmngai leh mi thahnemngaiten tha leh zung, sum leh paiin chhiatna tuar mekte an chhawmdawl a. Chhiatna a lo thlen a, kan theih ang anga intanpui tawn hi a lawmawmin a ropui e tih bak, thli leh ruahpui lo thawk tur kan dang thei lo. Khuarel thil lo thawk thin lakah hi chuan ro lo rel ve chiam theih lah a ni der si lo.
Khuarel chhiatna hrang hrang thlentu heng thlipui leh ruahpui, lirnghing, tlangkang, leimin etc. te hi pumpelh theih a ni chiah lo na a, chhiatna a thlen thin tawrh nep dan emaw, pumpelh dan emaw hi chu a awm thin a; chu chu kan ngaihthah chuan tuar nep deuh thei tur pawhin kan tuar ta vak thin a ni.
Entirnan: Ruah a lo sur hian, tuihawk luankawr fel tak a awm loh chuan hmun hrang hrangah a luang darh a, ruah a lo sur rei deuh chuan lei a chiah hnip a, lei a hnip chuan a lo tawlh ta mai thin a, leimin a siam a, leimin chuan chenna in te a tawlhpui emaw, a hnawl emaw ta thin a, inkalpawhna kawngte a chhiat phah a, electric ban te a tlu a, power a chhiat phah a; a chang chuan electric chhiatna thleng phut avangin kangmei te pawh a lo chhuah phah thin bawk. Tuiluankawr tha kan siam loh avanga chhiatna inkahpukchaw chho zut ang hi ‘khuarel chhiatna’ anga sawi zel tur a ni tawh lova, mihring kan inthlahdah avanga lo thleng a ni a; keimahni mihringin chhiatna kan insiam chawp ‘man-made disaster’ a ni tawh thin.
Thlipui leh ruahpui avanga Mizorama chhiatna hrang hrang thleng thinah hian, ‘man-made disaster’ kan tih ang hi a tam hlein a rinawm. Mithiamte pawhin tlangram khawpuia leimin tam tak hi chu mihring inthlahdah vangah an puh thin a. Lei dawlna lungrem (retaining wall) siam that tawk loh vang te, tuiluankawr tha a awm loh vang te, tuilakna tui pipe put ru nasa lutuk thin ngaihthah reng vangte hian lei a lo hnip zel a. Kum engemawzat hnuah lei nghet lo, lei hnip avangin leimin a lo awm thin. Lei a min vak tawh hnuah a minna hmunah ‘check dam’ te kan siam leh hnuhnawh a, a min zui zel loh nan hei hi a tangkai tho na a, chhiatna a thlen hma khan ‘chhiatna thleng thei a ni’ tih hriat theihna ‘sign’ a awm thin a, chu chu kan ngaihthah reng thin a ni.
Man-made disaster thleng lo tura tan kan lak sauh sauh a tul ta hle a ni.
Khuarel chhiatna…
Get real time updates directly on you device, subscribe now.
Prev Post
Next Post