King Slam ah Sinner a king

Ram hausa Saudi Arabia in Tennis-a mibikte inelna an buatsaih Six Kings Slam hmasa ber chu inrinni zan khan khelh zawh a ni a. World No. 1 Jannik Sinner chu champion hmasa ber a ni a, Rafael Nadal hnehtu Novak Djokovic chu pathumna a ni.
Six Kings Slam final-ah World No. 1 Jannik Sinner leh No 2 Carlos Alcaraz te inhmachhawn tur hian ngaihven a hlawh hle. An intum hnuhnung pathumah Alcaraz a chak vek vangin Spanish Alcaraz hian champion turin rin a kai hle. Alcaraz hian set a lak hmasa nghe nghe a, champion a hnaih hman hle. Set la hmasa zawkah tang mah se kum kal meka khel tha tak Sinner er let a tuar lova, set hnih hloh zawnin tlawm zawkah a tang.
Rin lawk ang ngeia final hmuhnawmah Sinner leh Alcaraz te an inhnehtawk hle a, set khatnaah tie-break khelh a ngai nghal. Tie-break-ah Alcaraz a chungnung a, set a la hmasa. Set hloh hmasa zawkah tang mah se Italian Sinner a buai nau lova a khel tha zui hle. Set hnihna leh set thumnaah break a neih a chhawr tangkai ve ve a. Game thum ve ve hloh chungin set hnih a la zawn a. Vawi thum ngawt a hneh loh zawn tawh Carlos Alcaraz lakah 6-7 (5-7), 6-3, 6-3 a hnehna changin Six King Slam champion hmasa ber a ni ta a ni.
Six King Slam hi Jannik Sinner leh Carlos Alcaraz te an inhmachhawn vawi 11-na a ni a, Grand Slam a vawi li champion tawh Alcaraz-a’n Grand Slam-a vawi hnih champion tawh Sinner lakah 6-5 in hma a hruai mek a ni.
Nadal daltu Djokovic
Final hmuhnawm takah khelh a nih hmain Tennis player ropui filawr pahnih Novak Djokovic leh Rafael Nadal ten pathumna an inchuh a, inkhel hmuhnawm takah set hloh lovin Djokovic a chak.
Tennis tihmuhnawm zualtu, inel tawk em em reng mai Djokovic leh Nadal te inelnaa an intum hnuhnung ber turah Djokovic-a’n bul a tan tha a, game hnih chauh hloh chungin set khatna a la. Awlsam takin set khatna la bawk mah se set hnihnaah erawh an inhnehtawk ta viau a, tie-break khelh a ngai ta hial a ni.
Set hnihnaah hian 4-4 a nih laiin Djokovic-a’n break a nei a, 5-4 a hma a hruai laiin match point a nei hman hial a, a chak nghal teuh hle. Mak tak maiin dinhmunchhe taka ding tawh Nadal-a’n match point a save a, a khingpui a break let. Nadal hian Djokovic break nawn theihna hun tha a nei zui a, set hnihna a la teuh hle nghe nghe. Break an neih theih loh ve ve hnuin tie-break khelh a ni a, hun pawimawhah Djokovic chungnung zui lehin Nadal lakah hian 6-2, 7-6 (7-5) in a chak ta a ni.
Grand Slam-ah vawi 24 champion tawh Novak Djokovic leh Grand Slam-a vawi 22 champion tawh Rafael Nadal te hi vawi 61 an inhmachhawnna a ni ta a, an inkarah 32-29 in Djokovic a chungnung mek. Nadal hian Davies Cup 2024 atanga an tlak rualin Tennis a chawlhsan dawn a. A elpui lian Djokovic lakah record nei chhe zawk chungin a chawlh a ngai dawn ta ngei niin a lang. Davies Cup 2024 hi November ni 19 atanga ni 24 chhungin khel a ni ang.
Six Kings Slam-ah hian sum a tam hle a, champion hian US Dolloar maktaduai ruk zet a hum hawng a. Hei hi US Open champion in an hlawh let dawna tam a ni.