King’s Cup hmachhawn tur India

Ram palite inelna tur King’s Cup 2023 chu vawiin tlai dar 4:00 atangin khelh tan a ni dawn a. India chu forward pawimawh Sunil Chhetri tel lovin an inlan dawn. India tan hian Mizo player Lallianzuala Chhangte chu player pawimawh a ni ang.
Football Association of Thailand in ram hrang hrangte inelna an huaihawt King’s Cup 2023-ah hian a thlengtu Thailan bakah ram dang pathum; India, Iraq leh Lebanon te an inel kual dawn a. Final hi September 10-ah khelh a ni ang. Inelna hmachhawn tur zingah India hi FIFA Ranking-a sang ber dawttu an ni a, fifa ranking-ah 99-na ni mek India chungah hian no. 70-na Iraq an awm a. India hnuaiah hian Thlailand – 113 leh Lebanon (100) te an awm ve thung.
India hi tunhnaia inelna an hmachhawn hrang hrangah an chetha viau a, trophy pathum an chawi zawn. Tunhnaia an champion nate hi Tri-Nation tournament, Intercontinental Cup leh SAFF Championship te an ni. Heng inelna hrang hrangah hian Mizo tlangval Lalianzuala Chhangte chu India player pawimawh a ni vek a. King’s Cup-ah ngei pawi hian LZ Chhangte hi India innghahna lian a ni zui leh ngei ang.
King’s Cup 2023 hmachhawn tur zingah India tana goal thun hnem ber leh India captain ni mek Sunil Chhetri a tel ve dawn lo a. Chhetri hian mimal thil vangin ram aiawh rih loh a thlang. Tarlan tawh angin Chhetri a awm loh phei chuan Lallianzuala Chhangte a pawimawh leh zual dawn tihna a ni.
King’s Cup khel tura Sunil Chhetri a tel loh rual hian defender tawnhriat ngah pahnih; Rahul Bheke leh Pritam Kotal te chu India head coach Igor Stimac chuan ram aiawh turin a thlang tel lo teh tlat thung. Anni pahnih an tel loh lai hian Brandon Fernandes leh Suresh Singh ten India squad-ah hmun an chang let ve leh ta thung.
King’s Cup ah hian inelna huaihawttu Thailand chu vawi 15 an champion tawh a. India hi kum 2004 khan pahnihna an ni tawh a. Hei hi he inelnaa an chet that ber tum a la ni rih.