KISCE thawktu tharte fuih

Khelo India State Centre of Excellence (KISCE) a thawktu laktharte chu Sports & Youth Services minister Lalnghinglova Hmar chuan a kawm a. KISCE chu Centre of Excellence a nih ang ngeiin, Mizorama infiammi tha ber ber chherchhuaktu nih tum turin a chah.
Minister chuan KISCE-a awm tur infiammi talent nei tha haichhuah leh thlan kawngah leh training pek danah theihtawp chhuah thar a ngai tih a sawi a. Mizoramin infiamna kawnga hma a sawnnaah KISCE-a thawkte chuan mawhphurhna pawimawh tak an nei a ni, tiin, hun puma thawk tur an nih angin, a hmuna riahchilh tum a ni tih a sawi.
“Sports-a hlawhtling tur chuan a tha ber zinga tel a ngai a, induhsakna awm loin, result tha neia dik leh taima taka thawk turin ka ngen che a ni,” Lalnghinglova Hmar hian a ti a. National Games chu sawi loh, Northeast Games-ah pawh Mizoram result a la tha tawk loa, midang kan lehpelh theih hmain, an pen ruala pen phawt turin theihtawp chhuah a ngai tih a sawi a ni.