Klopp ruaitu thar Energy drinks brand Red Bull!

Klopp ruaitu thar Energy drinks brand Red Bull!
Taksa tihchakna in tur lam chi siamchhuaktu lar Red Bull chuan khawvel hmun hrang hranga an football buaipui chunga thuneitu sang tak dinhmun chelh turin Liverpool boss hlui Jurgen Klopp chu inremna an ziahpui a; German coach hian direct-in club enkawl dawn ta rih lo mah se football tho tho chu a buaipui tur niin a lang!
Kum sarih zet Bundesliga club Borussia Dortmund a enkawl hnua kum 2015-a Anfield club zawm Klopp-a Red Bul hna thar hi ‘global head of soccer’ a ni a, kum thar 2025 January ni 1 atangin a hna thar hi a zawm ang.
Energy drinks brand lar Red Bull hi Germany rama an top flight club hriat hlawh zinga mi RB Leipzig neitu niin, Austrian club Red Bull Salzburg leh Major League Soccer club New York Red Bulls-te hi an ta a nih bakah South America lam thleng thlengin an inzarpharh a, Brazilian club Red Bull Bragantino neitute an ni bawk.
Championship club lar zinga mi Leeds United-ah pawh hian chanpual tam vak lo an nei a, kumin hian he club front-of-shirt sponsor an ni bawk.
Kum 57-a upa German hian Red Bull chhungkaw hnuaia awm football kaihhnawih hi a vil chho dawn a, a hna thar tur chungchang sawiin, “Ka hna chu a danglam ta deuh a nih pawhin football leh he game siamtute ka hmangaihna chu a danglam ve ngai dawn lo.
“Kum 25 dawn khelmual sira hun ka hman hnuah heti ang project thar ka han luhchilh tur hi ka va phur tak em,” a tichhuak ve hluai!
Red Bull lam pawhin an mithar lakluh hawi lam tur sawichhuak ve nghalin, “Klopp hi kawla ni chhuak chhiara vakchhuak tur a ni lo. A hna ber tur chu khawvel hmun hrang hranga kan team enkawlte khelh dan kalphung leh hawilam tur (playing philosophy) bakah transfer kalpui dan (transfer strategy) leh coaching hmasawn zelna chungchang (coaching development) lama thurawn petu tur a ni.
“Jurgen Klopp hi khawvel football huap pawha pa ropui leh huhang ngah berte zinga mi a ni pha a, a thiamna (skill) namen lo zet leh a ngaihawmna (charisma) hi hmuhhmaih theih a ni lo bawk,” tiin transfer strategy leh coaching development lam khawihtu company CEO Oliver Mintzlaff chuan a sawi a, head of soccer hna a thawhna turah khawvel huap football huanga danglamna thlentu a nih tur thu a tarlang tel bawk.
Tunlaia football coach tha berte zinga miin club pawh ni chiah lo company lian pakhata football head hna a tawk ringawt tur chuan Germany ramah mak tih a hlawh a, a club hlui pakhat Dortmund fans lam pawhin an hrethiam thei lo tih German newspaper lar leh lian Bild-a an head of football Christian Falk chuan a sawi!
BBC Radio 5 Live Euro Leagues podcast-ah Falk chuan, “Inhnialna tichhuaktu a ni chiang a, Germany ramah chuan a thlarau a hralh ta em ni tiin an sawi sup sup a, kei chuan chutiang a nih loh thu leh a vilhvalh tur zinga mi Leipzig chu club a nih thu ka sawi a, Dortmund fans lamin an pawm thei lo zual,” a ti.
Dortmund supporter pakhat chuan an long-time hero ve em em Klopp-a chuti mai maia in tur siamtu company Red Bull-in an chhawr tur chu ngaingam loin social media lamah Nilaini zing khan a angchhuak a, X-ah second khat lek chhunga a zahawmna leh ropui thinnna a thehthang ta mai a hriatthiam loh thu a post!
German football-a mi langsr tak tak leh an fan-te chuan Klopp hi Germany team enkawl tura an lo hual rilruk mek a ni a, 2026 World Cup zawhah tuna manager ni mek Julian Nagelsmann hi club football-a kirleh tura ngaih a ni a, chu mi hnuh Klopp hi national team boss ni tura an beisei a ni.
Bayern Munich leh Germany captain hlui Lothar Matthaus meuh pawhin Klopp chu company lamah board-level leh backroom member a nih hlen loh a beisei thu a sawichhuak ve hial bawk.
Klopp hian kum kaw chhungin Liverpool kha trophy pariat lakpui hmanin, chu’ng zingah chuan Premier League leh Champions League title pakhat ve ve a tel a, season liamta tawp rual khan Englan-a a hna chu a bansan ta a ni.
Kum 2001 khan Mainz-ah manager hna a tan a; kum 2008-ah club lian zawk Borussia Dortmund zawmin, Bundesliga title pahnih a lakpui piahlamah 2013 Champions League final a thlenpui nawlh a, Europe club lianho ngaihven rawn pakhat a tling chho ta hluai a nih kha.
May 2015-ah chawlh hmang rih tura insawiin Dortmund-a a contract neih lai a titawp a, chu mi kum vek October thla a herchhuah chuan Brendan Rodgers thlak turin Anfield a pan ta a ni.
Austrian energy drinks producer Red Bull hian football bakah ice hockey, extreme sports leh motorsports lam thlengin an buaipui a, chu’ngah chuan sum an dah a, khawvela car intlansiak level sang ber Formula 1-ah team pahnih ngawt neiin, pakhat zawk Red Bull Racing phei chu driver leh constructor title kawl mektute an ni nghe nghe.