KOHHRAN HRUAITUTE HNENA PU M.LALMANZUALA OPEN LETTER KHA

Dr. Lalsiamhnuna
Mob. 8131822506
Kan mithiam hmasa, tawn hriat ngah tak, a Zo a Vai zinga khawsa tam, pa taima, inzir peih, mi tlang, pa huaisen, ram vei tak Pu M. Lalmanzualan, a thil vei zawng, kan ram siam that nana pawimawh nia a hriat chungchang a puak chhuahna- Mizorama Kohhran Lian zual deuh deuh pasarih Hruaitute hnena a OPEN LETTER (6.8.2025), You Tuber pakhatin a tihchhuah kha ka lo ngaithla a, mi tam tak vei, an sawi chhuah ngam si loh emaw sawi zik tluak zo dawna an inhriat loh avanga sawi lova an tlak tak emaw (ni awm tak) tlang tak a a rawn sawi piap piap mai kha chu, kan tim sung sung mai alawm maw le. A bengvar thlak viau bawk si. A thahnem ngaihna tawmpuiin tu man huat thuah i la lo ang u. Chhan ngai an tih tak leh kan Kohhran Hruaitute chuan an la rawn chhang turah ngai ila, kei erawh chuan a thahnemngaihna tawmpuiin, a hriat fuh loh palh ni a ka hriat te sawifiahna leh ka ngaihpawimawh zual te sawina remchanga hmangin ka lo inrawlh ve lawk ang e.
“Mizoram, corruption kai rualna ber leh natna tihbaiawm pui puiin a bawm nasat ber” a tih-ah khan, “natna tihbaiawm pui puiin a bawm nasat ber,” tih kha chu –ei leh ina kan fimkhur tawk lohna te, zu leh ruihhlo dang leh zuk leh hmuam kan khawih nasat dan te, mipat hmeichhiatna lama kan inthlahdah avanga HIV/AIDS kan kai nasat dan te, kan thih nasat dan te leh nupa inthen kan tam dan em em atanga teh pawhin a pawmawm viau. “Corruption kai rualna ber,” a tih erawh kha chu, “a ni em em dawn em ni?” ka lo ti deuh va, a chhan chu, India rama state corrupt zual an sawi zingah kan lang lo va, kan CM leh a thawpuite lahin, an sawrkar tirh te atang leh tun thlengin corruption an do nasat thu an sawi cham chi bawk si. Mahse, kan senior, mithiam, tawn hriat ngah takin a tih si chuan ni turah ngai mai ila. A sang sawm zingah lang lo mah ila, ‘corruption kai rualna ber’ a nih theih tho a lawm.
Kohhran hian corruption a do tak zet em?
Tun hma atang tawhin kohhran hian Corruption a lo do tawh thin a, Presbyterin Kohhran phei chuan kum 1979 atang khan Synod Inkhawmpuiah te sawi a lo ni tawh a, 1982-ah phei chuan ‘Corruption Do Kum’ hial a lo puang a, Corruption chungchangah thuchhuah (pamphlet) siamin, kohhran tinah thawn darhin, kohhran mite ei rukna leh hlemhletna laka fihlim turin ngenna a tichhuak bawk. Kum 2007-ah Synod Social Front-in Booklet-‘Corruption I Do Ang U’ tih chu a chhuah a; chu pawh chu duh tawk mai lovin, kum 2022 Synod Inkhwmpui pawhin hlemhletna do kawngah nasa zawka hmalak a rel a, chu chu a kum leh, 2023-ah ennawna tihchhuah a ni bawk. Kohhran dangte hian eng tin nge hma an lak chiah chu ka hre lo na a, Pastor leh Speaker tam tak te thusawi atang te hian kut kuangkuahin an thlir mai mai bik lo tih erawh chu a hriat khawp mai. Chuvangin, Kan rama kohhran ho te hian ‘Corruption’ hi chu kan duh lo theuh va, kan Do nat dan erawh a inang lo a ni mai.
‘Thatchhiat Theology’ a lo zirtir reng em?
Kohhranah hian ‘Thatchhiat Theology- Isua ringa, hlima, zaia, lam vak vaka duhtawk mai’ zirtir hun (a awm a nih ngai chuan) tun hma lam deuh tak tak kha a nih a rinawm. A nih loh pawhin, kal fawr mi tlemte bak an ni lo vang, ti mai teh ang. Chhandamna/Piantharna hi chu chan fiah chi a ni. Ral rin a fuh thei lo. Chhandam kan nih nan hian Lal Isua rin bak, kawng dang a awm lo hrim hrim. Chatuan hremhmuna kal tur amah kan rin avanga Van Hmun Ropui changtu tur kan lo ni ta mai hi a mak a, a lawmawm em avangin thu leh hla a puan chhuah hi kan tih tur dik tak a ni. Kan la ti nasa lo mah mah. Chutih rualin, Chhandam fate chu inthlahdah tur kan ni hauh lo thung. ‘Thawhrim chu chawlhna nuam a ni, Ringtute tan inthlahdah a thiang lo, kan taima tur a ni.
Presbyterian Kohhran (bawk han sawi leh ila) chuan NILAI LEH BEIHRUAL THUPUI-ah pawh ‘Mihring sum hlu- Taihmakna’ tih te hi a sawi na sa ve viau a sin le. Hnathawk tura siam kan ni a, kan Pathian pawh englai pawha hnathawk reng Pathian a ni (Johana 5:7) tih te, ei zawnna tling hna hmuhsit loh tur tih te, Kristiante leh taihmakna tih te, taihmak hi Pathian thu awihna a ni tih te thlengin; hnathawhnaa rinawm tih leh taihmak hlawkna tih te nen lam kan zir. Tirhkoh Paulan Tita hnenah, “Kan mite chu tlakchham an neih ngai loh nan hna tangkai thawka inhmang reng turin fuih la, an awm mai mai tur a ni lo,”(Tita3:14) a tih te phei hi chu kan tuipui khawp mai. ”Tu pawhin hna a thawh duh loh chuan ei pawh ei suh se,” (2 Thes 3:10) tih te thlengin kan sawi maw le. Kohhran dangte pawhin hma an lak ve tho chu ka ring. Mahse, a tawk lo a ni ang e. Eng tin nge hma kan lak zel ang tih lam hi kan ngaihtuah a ngai a ni mai.
A tak taka chet chhuah a ngai:
Pulpit tlang atanga auh harh phak tawh loh, kohhran mi ni tho si, Ruai Ropui Tehkhin Thu a, ‘Chhuak la, kawtthlerah te, kawmkarah te kal thuai thuai la, pachhiate, piangsualte, mitdelte, kebaite hetah rawn hruai lut rawh’ a tih te leh ‘…lamlianah te, daiah te kal la, ka in khah nan mi han thlem lut hram rawh,’ a tih te, Catholic Baibul phei chuan, ‘…ka in awh khat turin mi han hruai lut lui rawh,’ (Luka 14:21,23) a tih hial lam hi kan luh chilh a ngai ta. Mi tam tak Pathian leh a kohhran ho lam hawia ke an pen mek laiin, nula leh tlangval thahnem tak kawtthlerah te, kawmkarah te leh, lamlian leh daiah te inawi tleina tur zawngin an vak huai huai a; chu tih mek laiin, zu leh ruihhlo dang te avangin chhungkaw tam tak mangangin an rum mek bawk si; eng tin nge kan tih tak ang?
Feh chhuah rawngbawlna:
Pastor-te leh Upa te hian mimal nun luhchilh zawnga rawngbawlna kan kalpui nasat a ngai ta. Kan pulpit sermon leh kan inkhawm kaihhruai dan te hi kan bel lutuk a, kan thu leh hla te hi a bil zo ta em ni? Mi hla te hnuh hnaih nan leh kohhran mipuite thlarau lam nun chawh harh nan kan intuaithar a tul tak zet. Pastor pakhat chuan, Zing |awngtai Inkhawma kal thin te- “Nu awm thei em em pawh ni bik lem lo, hah taka ni leng lenga hnathawk thin te tawngtai hlana lo mut bik chu ka inthiam theih thlawt lo,” a ti a, a kal ve tuk tin ta mai. En tawn atan a tha hle. Kal ziah chu a har. Mah se, Pastor leh Upa tam takin Zing Tawngtai Inkhawma kal hi kan tih turah kan ngai ta lo erawh hi chu a pawi khawp mai. Kohhran mipui te hian min phut tha ngam chiah lo na a, kan kal hi chu an duh tak zet a sin. Intuai thar kan ngai. Pastor pakhat nun khaw ro, a fapa duat lai thih thut avanga nun keh sawm ta; a biling a balanga Lalpa kuta tlulut tawp, nun tui hna thar nena thlarau thara rawngbawltu rawngbawlna nun zia chu sawi tham a tling. A bial chhung in tin deuh thaw-ah, pawl bik sawi lovin, home crusade an nei a, Upa ten an tawiawm tha bawk a, speaker leh counsellor hran reng an ngai lo; Harhna ropui tak a thleng.
Pastor leh Kohhran Upa, lar tak ni lem lo te pawh hian, nun tuihna thar nena thlarau thara rawng an bawl ngat chuan, aikal lak ngai miah lovin, kohhran mite zingah, nung takin rawng an bawl thei; Revival Speaker leh Counsellor tha tak an ni thei vek. A pawimawh ber chu tharau lainatna leh inpekna tak tak a ni mai.
Chuvangin, kan ram leh khawtlang nun siam that nan, kan Lal Isua thahnemngaihna tawmpuia, bial fan pangngai (ip kir, news letter sem, dam lo tlawh,ldt.) kan kalpui reng te bakah hian, Van Census tipung ngei turin, chhungkua leh mimal nun luh chilh a, nun khul chhuahna tak tak thleng phak programme i kal pui ang u.