Sawrkar damdawi in ni lo zawng, kohhran leh mimal damdawi in ho chuan Mizoram sawrkarin health care scheme thar a duan chu an ring ngam loa, re-imbursement system hmang zui turin sawrkar an ngen. Hetihlai hian sawrkar chuan cashless system hman chu an lo ruahman dan a ni tawh tih an sawi thung.Mizoram sawrkarin Mizoram Universal Health Care Scheme (MUHCS) a ruahman chu nimin, 2025 April 1 atang khan hman tan a ni a. A tirah sawrkar damdawi in niloten zawm lo vek tura sawi a nih laiin kohhran leh private damdawi in thenkhat chuan an zawm dawn a, heng empanelled hospital-a specialist doctor-te chu state chhung leh pawna damlo refer chungchangah thuneihna pek tel an ni.
Sawrkar ruahman lawk angin MUHCS hi April 1 atang khan hman tan a ni a. Kohhran enkawl leh private enkawl damdawi in tam zawkin an zawm theih loh tur thu ziakin an thlen tawh a. An buaina lian ber chu, ‘cashless’ a kalpui tum vang niin, reimbursement system-a kalpui leh turin sawrkar an ngen. Hei bakah hian damdawi in khawl, damdawi leh inenkawlna senso danga ‘sawrkar rate’ anga kalpui vek chu a rem lohna chin a awm tih an sawi bawk.
Hetihlai hian 2025 March 31-a sawrkar hriattirna chhuah danin, Mizorama kohhran leh private damdawi in zingah MUHCS zawm thei, empanalled hospital ni tur paruk an awm a. Maraland Gospel Centenary Hospital Siaha, JC Eye Hospital Aizawl, Nazareth Hospital Aizawl, Christian Hospital Serkawn (Lunglei), Christian Hospital Lawngtlai leh Med-Aim Adventist Hospital Champhai an ni.
Heng hospital paruk bakah hian Mizoram pawnah empanelled hospital 20 an awm a. Chu’ng zingah chuan BM Birla Hospital & Heart Institute Kolkata, Manipal Hospital (AMRI Hospital thin) Kolkata, AIIMS Guwahati, GNRC Guwahati, NEIGRIHMS Shillong, Silchar Cancer Centre te pawh an tel a ni.
Heng empanelled hospital-ah hian damlo a mamawhtuten rang leh tha taka inenkawlna an dawn theihnan Mizoram sawrkar chuan ruahmanna lailawk, ‘simplified referral system’ a hmang dawn tih puangin, Medical Referal Board pawmpui kher ngai loin, Mizorama empanelled hospital hoa thawk specialist doctor chuan a damlote hi Mizoram chhung leh pawna empanelled hospital-ah a ‘refer’ thei dawn a. Mizoram State Health Care Society chief executive officer kaltlangin tih theih a ni tih a sawi.
Hetihlai hian Thawhlehni khan Health & Family Welfare department hnuaia thawktu – district tina chief medical officer, district medical superintendent, community health centre leh primary health centre-a thawktute tan MUHCS chungchang hi inhrilhfiah a ni.
MUHCS hamthatna hi:
8 Mizorama sawrkar damdawi in zawng zawngah leh he scheme zawmtu private damdawi in, state chhung leh pawn amia hman theih a ni.
8 MUHCS policy 2025- 2026 hi 2025 April 1 atanga 2026 March 31 thleng a hman theih dawn.
8 Inziahluh theih hun hi thla thum chhung, 2025 March atanga May thleng hawn a ni.
8 Hemi chhunga inziaklut hman lo tan July 2025 chhung inziahluhna hun (grace period) hawn a ni leh dawn a. A hun pangngaia inziahluh man aia zaa 50 late fee pek a ngai thung ang.
Kohhran leh private hospital ho zingah MUHCS zawm awm tan
Get real time updates directly on you device, subscribe now.