KOHHRANIN A MITE PIAN HLIM A|ANGA THLAN THLENG A UM ZUI

Prof. Lianzela

Social Media-ah Kohhran selna, duh khawp lohna sawi chhuah a ni ta fo va. Kohhran kan selna leh duh khawp lohnate hian dikna chen pawh a nei mah na, mahse a then tena kan beih dan hi chu a lutuk deuh lo maw a tih theihin ka hria! Kohhran pawl (denomination) hrang hrangin kan member-te kan enkawl (um zui) dan ka hre zau lo va. Tun tumah hian ka awmna kohhran, Presbyterian Kohhranin a member a um zui dan (Kohhran mal leh Synod-in) tlem han tar lan ka tum a ni.
Nau a lo pianin kan Kohhran (Venghnuai Kohhran)-in Rs 2,000/-in nau piang kan en thin. Remchang hmasaah Pastor-in puithu (khun khan) takin nausente hi Biak inah Baptisma a chantir a. Naupang Sunday School (Beginner Department)-in heng nau piang tharte hi kum 4 an tlin huna Sunday School-a lo kal turin an hual a, card (hualna) an pe thlap thin. ‘Nau Hual’ programme hi mumal taka hman a ni thin.
Kohhran thenkhat Pre-Beginner Department neite chuan kum 4 an tlin hma pawhin naupangte chu Pre-Beginner Department-ah an lo awmtir a, theih ang angin an lo zirtir thin. Pre-Beginner Department nei lo pawhin kum 4 tling chin chu Beginner Department-a thuttirin, Senior Department an nih thleng mumal taka kaihruaiin, Pathian thu an kum (age group) milin an zirtir thin tih kan hre awm e.
Naupang kum 14 tling chu Dan zawh kima Dan chhunga lawm luh turin uluk taka zirtira enkawl an ni a. Khun khan/Puithu takin Dan chhunga lawm luh zan Kohhranin a buatsaihsak thin. Hemi zan hian Lalpa Zanriah Sakramen pawh kilpui thin an ni.
Nupui pasal nei rual, innei duh an member-te chu Kohhranah puithu leh zahawm takin inneihna a buatsaihsak a, Pastor emaw Kohhran Upa, Inneihna kawltuin a inneihtir thin. Kohhran Dan Thianghlim Biak In hawnga inneite chu Kohhran leh a hnuaia Fellowship ten lawmpuina an pe thin.
Dam loh nikhuain Kohhranin a mite a tawngtaisakin a theih ang angin a tanpui thin. Damdawiina awmte chu a kan thin a, dam lo na zualte phei chu dam lo kanna rate pawh a pe sang deuh bik thin.
Tu chungah pawh thihna a lo thleng thei a. Thihna hial a lo thlenin a member-te Kohhranah an active leh active loh thliar hauh lovin Kohhranin an chenna in etc.-ah a vui a. Chu chu duhtawk mai lovin thlan thlenga um zuiin thlanmualah a vui leh thin. Kan Biala Kohhran pakhat chuan an member thi Rs 8,000/-in a ral thin. Ka lawina Kohhranin Rs 7,000/-in kan ral thung.
Presbyterian Kohhran theuh theuh pawh kan tih dan a inang famkim lova, kan member-te kan chiauau dan leh ngaihsak dan pawh a inchen lo. Kohhran tam ber hi chuan rethei chhawmdawl/tanpui pawh kan uar fu a ni. Ruihhlo ngaite kan tawngtaipui a, camp kan buatsaihsak a, theih ang angin kan buaipui thin! Mi dang camp siama lut duhte tan conveyance, buaipui leh fee te tumsakin kan che ve thin bawk! Kan Kohhranin a tul apiang kawm a, titipui turin Counsellor kan ruai a, ani hi a tul thei khawp mai! Counsellor hi thla khatah Rs 20,000/- lawmman atan kan pe.
Kan veng mite tana kan Kohhranin kan tih dang pakhat chu ‘Pass Lawmpui’ a ni. Board exam etc. HSLC, HSSLC, Graduate leh Post Graduate etc. exam-a pass te chawlhni zan inkhawmah lawmpuina ‘Citation’ leh Rs 500/- theuh kan hlan thin. Hemi zana thuhriltuin pass lawmpuina leh anmahni fuihna lam thuchah a sawi thin. Zawngchhangthlak hlein kan hria. Pass kan lawmpuite hi kan Kohhran member ni lo, eng Kohhrana mi pawh kan huam vek thin.
Kan Bial chhunga Kohhran pakhat chu chawlhkar tluanin Inrinni leh Chawlhni tih lovah chawhnu dar 2-ah an veng chhunga ruihhlo ngaite pualin Biak Inah an tawngtai thin. Hemi inkhawmah hian tawngtaina tur (prayer item) dang telh an rem ti lo. Hetiang khawp hian ruihhlo ngaite tan tan an la a, an entawntlak tak zet! Kohhran eng emaw zat, ruihhlo a rem nana thawktute sum faia tanpui thin an awm. Heng Kohhrante hian VDP, YMA leh Ruihhlo Dotu Pawl dang hnenah sum an pe thin.
Kohhran mal, Pastor Bial, Presbytery leh Synod-in Kohhran member-te tanpui leh enkawlnaa an thawh, an insensona kan sawi kim seng lo vang. Presbyterian min khai khawmtu Synod hnathawh thenkhat (mipuite hmakhaw ngaia a chetna) i lo thlir ang u.
1) Lungin tangte zinga rawng bawl thin Prison Ministry a nei. He Ministry hian Central Jail leh District Jail-a rawngbawlin, Jail tang chhuak tan ‘aftercare’ pawh a kalpui.
2) Campus Ministry - zirna in hrang hranga luh chilh rawngbawlna a nei. Online pawhin biak theih reng an ni. Campus Ministry hi an buai viau mai.
3) HIV/AIDS veite tan Grace Home, Durtlangah a nei. Doctor, nurse etc. inpe tak takten Home hi an enkawl.
4) Rescue Home, Durtlangah leh Champhaiah a nei. Tunah pawh eng emaw zat enkawl lai an nei.
5) Nau Hnuchham enkawlna - Hmangaihna In, Durtlangah a nei. Central Hmeichhe Committee-in an mamawh an pe thin.
6) Kum 2021 khan Synod-in Zirlai Viltu Committee a siam a, chu Committee chuan Mizo zirlaite All India Services, Central Services etc. an tlin theih nan hma a la chho a. Zirlaite hman tangkai theih tur Synod Resource Centre, Synod Conference Centre-ah a hawng a. Chuta kal thin zirlai hlawhtling, UPSC Prelims-a tlinga Mains exam tur a awm. Ani lo pawh MPSC exam-a hlawhtling a awm bawk. Hlawhtlinna changtu lo pung zel rawh se.
7) Presbyterian English School hi din a nih chhan pakhat chu, khatih hun laia English Medium School (Private-a din thenkhatin) fee an tisang lutuk a, nu leh pa (parents) leh mipui min ‘exploit’ nasa lutuk a, chumi tinep tur leh zirna standard tha zawk sikul neih a nih theih nana tih a ni.
8) Synod Multipurpose Training Centre pawh eizawnna fumfe miin a neih theih nana din a ni. Chutiangin Kohhran Hmeichhe enkawl ‘Women Centre’ pawhin hmeichhe eng emaw zat lifeskills a zirtir mek.
9) Family Guidance & Counselling Centre (FG&CC) ngei pawh chhungkua leh mimal harsatna neite tan pan theih tura siam a ni.
10) Kum tin Synod Hospital, Durtlanga damlo awm man pe thei lote leiba Synod-in a rulhsak tawk tawk. Ba rulhsak zingah Presbyterian Kohhran ni lo an tam khawp.
11) Synod Relief Fund atangin kum tin Khuarel Chhiatna tawktu eng emaw zat a tanpui. Hetiang tanpui tak zingah Presbyterian Kohhran mi ni lo pawh an tel nual thin.
12) Zirlai harsate chhawmdawlna scholarship pein dinhmun tleu te a chhawmdawl thin bawk.
13) Synod Archive pawh hi mipui tan tangkai tak a ni. Record hlui mamawhtu kan tam tual tual.
Kohhranin a mite a um zui dan:- Heng thil tlem te ka han thai lan atang mai pawh hian Kohhranin a member leh ram mipui tana tha leh sum a sen ve thinzia kan hre thei awm e. Mi thiam leh thil chik zawk ten ziak phei se ka ziah bak pawh ziah tur tam tak an hre ngei ang. Hei erawh i hre reng ang u. Kohhran hian mite hmuh leh fak an hlawh nan thil a ti lova, Kohhran neitu leh lu ber Pathian tan leh Ama ropui nan a ti thin! Miten Pathian chhandamna he leiah leh vanah chang se, khua leh tui tha ni se tih hi a duh a, chumi atan chuan a thawk mai thin zawk a ni.

“.....thil tha tih chu kan awmna turin Pathianin a buatsaih lawk a ni.”