Kolasib-ah science seminar

District Education Office Kolasib leh SCERT hnuaia Science Promotional Wing buatsaihin Kolasib-a high school zirlaite pualin August 30 khan District Level Science Seminar 2024 neih a ni.
Seminar hi SCERT bultuma neih a ni a, NCERT-in india ram puma high school zirlaite intihsiakna atana thupui a thlan sa “Artificial Intelligence – Potentials and Concerns” tih hmangin school hrang hrang aiawh zirlaiten presentation pe in an intihsiak a ni.
Govt. Kolasib College-a mithiamte endikin, Kolasib district-a high school pakua an tel a. Grace MS Dawngzeli (Class X) St. John Higher Secondary School chu 1-na niin, 2-na Dorothy Zoramchhani (Class IX) Govt. Diakkawn High School, 3-na Esther Lalruatkimi (Class IX) CM High School an ni. Pakhatna hi state level intihsiakah Kolasib district aiawhin a tel dawn a ni.