Kolasib-ah Unique P/S siam

MLA inthlanpui atan Kolasib district-a polling station 89 awm zinga polling station dangdai bik (unique polling station) atana cheibawl, Government Chawngfianga Middle School, Saidan Kolasib-a 5/26-Saidan Polling Station chu Thawhtanni zing khan district election officer John LT Sanga’n a hawng.
DEO chuan Govt Chawngfianga M/S chu voter-te hip thei turin ngaw leh nungcha (forest) lam hawia cheibawl a ni, tiin, inthlan inbuatsaihnaah official-ten tih takzetin an thawk tih lantirtu leh voter-te pawhin an tih tur vote thlak an ngaihpawimawh theih nana cho phurtu atan unique polling station hi ruahman a ni tih a sawi.
Unique polling station bakah hian intlar ngai loa vote thlak theihna model polling station 1 leh hmeichhe hlang duty-na (all women managed) polling station 10 buatsaih a ni tih sawiin, polling station dang zawng zawng pawh eng, tui thianghlim, inthiarna, ramp leh mamawh dang daha cheithat vek a nih thu a sawi a ni.
Govt Chawngfianga M/S-in an sikul hungchhunga sai lim ker (sculpture) an neih sa chu beh chhanin, unique P/S hi forest theme-a chei a ni a. DEO hmalaknain sai lim hi cheithata rawng hnawih thar niin, tui chik chhuak reng thei turin fountain siam nghal a ni a. Sikul chung, a bang leh a chhehvel chu thawmthat ngai lai thawmtha in rawng hnawih thar vek a ni a. Mi hip thei tur zawngin photo booth, lemziak, fountain leh a cheina thil chi hrang hrang siam a ni. Environment, Forests & CC Kolasib Forests Division chuan sikul bangah ramngaw leh nungcha lem (mural painting) engemawzat ziakin, an chei bawk.