Kolasib-in TB vei awm lohna district nih an tum

Kolasib district village council 56 awm zinga 30 chu TB vei awm lohna khua ni theia ngaih an ni tawh a. Distric pum chu TB awm lohna district nih tumin an inruahman mek.
District TB Forum Kolasib chu an chairman, bawrhsap Robert C Lalhmangaiha hoin Ningani khan an thukhawm a. Chairman chuan India sawrkarin kum 2025 ah TB umbo a tum a, chuvangin he umbo hna thawk tur hian theihtawp chhuah theuh a ngai tih a sawi.
Senior CMO Dr RK Lalthlamuana sawi danin, kumin August thleng khan Kolasib district-a village council 56 zinga VC 30 chu ‘TB free village’ ni thei tur an ni a. TB free village-a puang tur hian mi 1000 ah mi 30 tal test an ngai a, chu’ng zinga 1 aia tam TB vei an awm chuan TB free village-a puan theih an ni lo.
Thutkhawmah hian TB chungchanga hmalak dan tur ngaihtuahin Kolasib district chu ‘TB Free District’ a nih theih nan district khaw hrang hrang VC kaltlangin TB chungchang inhrilh nise, an ti a. Home department enkawl lai – District Jail, 1st IR Bn Hqrs Mualvum, Vairengte-a IR duty-te leh Excise & Narcotics duty-te pawh an hriat tur tul hrilhhriat nise, TB vei mekten treatment an lak laia eitur tha an ei theih nan Nikshay Mitra (Community support of TB Patients) tam zawk nei turin Kolasib-a office tinah ngenna siam nise an ti bawk.
Kumin chhungin Kolasib district-ah TB vei rinhlelh mi 1703 sample test niin, TB vei hmuhchhuah 144 an awm a, tunah hian Kolasib district-ah TB vei enkawl lai 94 an awm a ni.