Kolasibah kawn chei intihsiak

Kumin Krismas leh kumthar vuakveta Kolasib khawpui chhung veng hrang hrang kawn leh hmun remchang lai incheisiak buatsaih dan tur sawi hoin Thawhlehni khan bawrhsap John LT Sanga hoa thukhawm a ni.
Bawrhsap chuan Mizo Kristiante hunpui Krismas leh kumthar vuakveta in leh khawlai chei chu hunpui boruak siamtu pakhat a ni, tiin, kuminah pawh Kolasiba veng hrang hrang kawn leh hmun remchang laite chu VC-te kaihhruaiin chei leh tura ruahman a ni tih a sawi. Kumin hian ‘DC Bangla’ chu kumdang aia uara chei tum a ni a, Krismas leh kumthar vuakvetah a duh tan DC bangla chu tlawh theiha siam leh tum a ni tih a sawi bawk.
Veng/kawn chei chungchang sawihonaah hian district administration official-te bakah DUDO Kolasib, Kolasib Town Joint VC Association chairman, Sub-Hqrs YMA leh MHIP Kolasib aiawhte, MJA Kolasib District president leh ZOOM Kolasib aiawhte an tel a. Kawn chei intihsiak hi VC-te kaihhruaina hnuaia kalpui a, lawmman siam nise, tih a ni a. Kolasib district-a Civil Sub-Division-ah te veng/kawn chei an duh a nih chuan SDO (Civil) te kaihhruainaa kalpui nise, an ti.
Kumin atana Kolasiba kawn/veng chei endik turin sub-deputy commissioner Dr Lalramdintluanga kaihhruaiin ZOOM Kolasib ruat an ni a. Endik hun atan December 23 zan ruat niin, result puan leh lawmman sem hun chu DC kuta dah a ni.