Korea Open-ah Sindhu tlo lo
Korea Open-ah Sindhu tlo lo
South Korea khawpui pakhat Yeosu-a Korea Open Super 500 tournament khelh mekah double Olympic meda-llist PV Sindhu chuan Nilaini khan women’s singles first round a paltlang zo lo a, minute 58 chhungin Chinese Taipei player Pai Yu-Po lakah 18-21, 21-10, 13-21-in a tlawm.
Thawhtannia hmeichhe singles badminton world ranking thar tarchhuahah Sindhu hian a career-a a hniam ber hun tawngbuain world number 17-na a luah a, Korea ramah kum 32 mi ni tawh leh world no. 22-na daih luahtu Pai Yu-Po hneh loin opening round-ah a tla nghal ringawt!
He tournament kal laiah hian Indian shuttler rual an inlan hnem hle a, men’s singles competition lamah Priyanshu Rajawat chuan second round lut turin tualchhung player Choi Ji Hoon chu straight-game hmangin a hneh.
World number 32 Rajawat hi Orleans Masters winner niin, Korea rama a bultanna inkhelah minute 42 chhungin Ji Hoon hi 21-15, 21-19-in a paltlang a, top seed Kodai Naraoka of Japan a tum leh ang.
Men’s singles match dangah Kiran George erawh opening round paltlang zo loin a tla a, Chinese Taipei world number 29 Wang Tzu lakah 17-21, 9-21-in a tlawm.
Aakarshi Kashyap, Tasnim Mir, Mithun Manjunath leh Ashmita Chaliha-te pawh first round paltlang zo lo zingah telin, an tan tournament a zo.
Kashyap hi 12-21, 17-21-in Chinese world number 20 Zhang Yi Man lakah a tlawm a; Mir hi 11-21, 18-21-in Korean world no. 19 Kim Ga Eun chuan a hnawtchhuak.
National champion Mithun pawhin Malaysian world number 23 Ng Tze Yong a hneh lo a; Ashmita pawh Olympic champion Chen Yu Fei lakah 13-21, 12-21-in a chak lo ve bawk.
Mixed doubles opening round paltlang zo loin B. Sumeeth Reddy leh Ashwini Ponnappa tangdun pawh 21-23, 21-13, 12-21-in Korean pair Song hyun Cho leh Lee Jung Hyun lakah an tlawm.
Kumin June thla maia Victor Denmark Masters international challenge title latu mixed doubles pair N. Sikki Reddy leh Rohan Kapoor chu second round lut zingah telin, Phillipines pair Alvin Morada leh Alyssa Ysabel Leonardo lakah 21-17, 21-17 hnehna an chang a, Indian pair hian Chinese fourth seeds Feng Yan Zhe leh Huang Dong Ping inkawp an su leh dawn a ni.
Khawvel badminton inelna lian BWF World Tour an tih hi level parukah an then a, chu’ngte chu – World Tour Finals, four Super 1000, six Super 750, seven Super 500 leh 11 Super 300-te niin, level hniam ber BWF Tour Super 100 level a la awm bawk a, hei pawh hian ranking point a keng tel.