KRISMAS NI DEC. 25 HI MILEM BETUTE A|ANGA KRISTIANTEN AN COPY CHHÂWN, AN TI MAW?

Dr PC Biaksiama
Kumin 2025 Krismas hun lawmawm December 25 a lo hnai leh ta. Khawvela Kristian kohhran tam berin nghakhlel taka kan thlir mek lai hian, a ngainêp pawl leh sawi hnâwm pawl an awm ve reng a. Mi tam tak rilru an tihnual tawh bawk a. Hemi chungchangah hian thu dik tak dap chhuah kan tum dawn a ni.
Sawi hnâwmtute sawi dan tlanglawn berah chuan: Krismas December 25 hi Rom-ho tihchhuah a ni, tia an puhna hi a ni. Roman Emperor Constantine-a Kristiana a lo inleh khan, ama hovin AD 336 khan Dec 25 ah Krismas an lo hmang tan a. Isua pian ni tak tak a nih vang ni lovin, he ni hi Rom-ho Ni pathian hneh theih loh Sol Invictus a birthday an lo chawimawina ni luahlan nana kristianten remchang taka an lo lakchhawn ve a ni, tih hi mi thiam thenkhatten tun thlenga an puh dan a ni. Tin, Rom-ho pawh chuan hmasang Babulon lal ropui, khawvela milem biakna tichhuaktu Nimrod-a fapa Tammuz-a birthday an hman thin an lo lakchhawn a ni a, an ti zel a. Tichuan milem betu Babulon-ho atanga intanin, a hnuah Rom-hovin Ni pathian biakna ni atana an lo lakchhawn chu kristianten an Isua piancham lawmna ni atan an lo hmang ve ta a. Chuvangin Dec 25-a krismas lo chhuahna tobul chu milem betute tih dan copy chhawn a ni, tih hi, khawvel mithiamte min zirtir dan, Kristian mithiam tam takin thudik emaw tia min zirtir ve bawk thin tho a ni.
Hetiang taka Kristiante kût hlimawm leh nghahhlelhawm berin milem betute hnen atanga entawn chhawn ang leka an chhuah chhiat hle karah hian Canada rama kristian mithiam Wesley Huff-a chuan Krismas hi Milem Biakna a ni lo (Christmas is not Pagan) tih thu a chhuah – The Gospel Coalition, Canada-in an rawn chhuah chhawn te, Reformed Baptist Blog-in an chhuah zui te leh, Wesley-a thuziah chu Kristian inti ve tho a ni mai thei – Michael Wordsmith-an Wesley-a tanhmun “A Point-by-Point Rebuttal… tih thu hmanga a rawn hnial lêt dan te chu amah leh a thu ngaisangtuten an rawn chhuah chhawn kan ngaithla dawn a ni. An lehkhabu ziah source kan laknate hi hetiang youtube video atang chuan sawi chhawn vek a rem chiah lova, a chhui zui duh tan reference tlemte kan pe zeuh chauh a ni e.
Aw le, hetianga sawi dan leh puh dan hrang hrangte hi krismas sawiseltu pawl thenkhatten tun thlenga thudik anga December 25 an sawinepna hmanrua a ni a. Mahse heng hi dawt thu maia puhna, thu dik lo ‘bogus’ a ni tlat mai.
He puhna thu hi Kristian zinga Krismas dotute zingah Dec 25-a krismas ni serh hi milem betute nena inthlunzawmna a nih avanga hman tlak loh angin kohhran pawl thenkhatten krismas an hman duh loh phah ta a. Ringlo miten Kristiante leh kan Krismas min chirhtheh nan an hmang bawk a; mi rilru an tihnual thin a ni.
Chutia kristiante kût ni hlimawm leh nghahhlelhawm berin sawisel a tawha, thil hre ril leh hre thuka inngai mithiamten ‘Masi hman tuiawm lo rawih khawpa an sawi chhiatna chu eng nge a awmzia tiin Christian Research Centre chuan 2022 kum atang khan a lo chhui ve tan tawh a. Media evangelical channel-ah leh tun hnaiah Gospel & World News channel-ah Krismas chungchanga dawtthu leh thutak thliar hrangin chipchiarin post darh a ni tawh a. Tunah chuan a tlangpui chauhin Krismas hman tan dan history dik tarlan kan tum ve a ni.
Puhna 1-na: Sawi tawh angin, Dec 25 hi Rom-ho Ni pathian Sol Invictus birthday leh Babulon pathian Tammuz-a birthday, kristianten an copy chhawn mai anga lo sawi chhuaktu hmasa chu tute nge ni, hming hmerha dap chhuah tur an awm em? tiin a history lamte chhui a ni tawh a. Mak tak maiin miten Krismas sawi bawrhbân phah nana an lo hman thin sawi chhuaktu chu hmasang mi pawh ni lo, tun hnai, 19th century laia Scotland rama Free Church pastor pakhat a lo ni reng a, a hming chu Alexander Hislop-a a ni. A lehkhabu ziah tun laia mi tam berin Luka ziak tluka an rin The Two Babylons, 1858 chu rinthu leh phuahchawp thil, fact check dawl lo, Krismas sawihnâwmtute thu leh hla mai a lo ni. Chuvangin Krismas leh Babulon milem pathian Tammuz-a khan inzawmna an nei lo, tih hi kristian mithiamten an zir chhuak tawh a.
Puhna 2-na: Tun hnaiah nasa taka kristianna tobul sawi sawptu leh ziaktu lar Dan Brown-a phei chuan a lehkhabu hriat hlawh tak The Da Vinci Code-ah chuan “Kristianna eng thil mah hi original a awm lo!” a’n ti thlawt mai a. Kristian sakhaw pian chhuah hma a Persia-ho pathian biak kha Pathian Fapa tih leh Khawvel Eng an tih kha December 25 a piang a ni,’ tiin huaisâr takin a lehkhabu kan sawi tak phek 55-na leh 28-29 ah chuan a puh ve thâwr bawk a. Finfiahna mumal reng a sawi zui bawk si lova. Chutianga hre chiang inti mithiam leh ziaktu lâr bawk siten an sawi thâwr thâwr tâkah chuan kristian ni lo khawvel mipui tam takte awih nuam tih zawng tak a lo ni zel si a.
Heng puhnate leh a dangte hi engtin nge kristian mithiamten an chhân let ve dan hi kan thlir tel loh chuan kan rilru an hmin thei mai dawn a, chuangin he kan thu leh hla hi ngaithlatuten ngun taka lo ngaithla turin kan in chah a ni. Dec 25 krismas ni hi Rom hovin an Ni pathian biakna ni atana an hman, kristianten an lo copy chhawn anga puhna chu a dik lo tih kristian mithiamten an hmu chhuak tawh bawk. Kristian hmasaten December 25 a Isua pian ni champha an lo hmang thin kha Rom hovin an Ni pathian biakna ni atan an lo copy zawk tih hriat chhuah a ni leh tawh a. A inlet thawk a nih chu. Engtin nge an hmuh chhuah, tih hi kristian kohhrante tan chhinchhiah tlak a nih avangin chipchiar deuha thil awm dan sawi fiah a tul awm e.
Kohhran chanchin (church history) zirna atangin
Thuthlung Thar kohhran hmasate chanchin kan hriat hlat theih berah chuan AD zabi hnihna lai khan December 25 hi Krismas ni atan ringtu hmasate khan an lo hmang tawh a ni. Hei hi rinthu ni lovin Kohhran Pa-te (Church Fathers) record hlui ber berte atangin ziaka finfiahna (documentary evidence) awm vek a lo ni a. Kohhran hruaitu hmasa Hippolytus of Rome (AD 170-235) te, Sextus Julius Africanus-a (AD 160-240) te leh Clement of Alexandria (AD 150-215) te khan AD 200 vela an lehkhabu ziahah khan Dec. 25 hi Isua pianni a ni tiin, ringtu hmasaten chhut chhuakin Krismas ni atan an lo hmang daih tawh tih pawh an thuziak chhiar theih a ni, tih hriat chhuah a ni. An hman tan hun phei chu hemi hma hi a ni thei ang. A tul a nih chuan hei aia chipchiar pawha la sawi zui a ngai mai thei.
Engtiangin nge Rom hovin Dec 25 hi an Ni pathian (sun god) biak nan an lo hman zawk le? Kristiante nge hmang hmasa Rom-ho? tih chu zawhna pawimawh tak a ni a, a chhanna hhre chhuak tur chuan Roman History atanga chhui tur a ni.
Kum zabi 3-na lai vel khan Rom lalram chhungah kristiante an pung chak em em a; Rom khua leh tui mi tam takin an milem sakhua kalsanin Kristianah an inlet nasa a; Roman magistrate hmingthang Pliny the Younger-a phei chuan milem biakna temple-te chu a ruak hiai huai mai, tiin Epistle to Trajan-ah a ziak a ni. Roman Emperor Juliana phei chuan Kristian sakhuaa mi an inleh tam vang a ni tih hriain, Rom sorkar khan tih duhdahna an ti nasa sauh reng a ni. AD 270 khan Roman Emperor thiltithei tak Aurelian-an lalna a rawn chang a, Rom lalram leh an sakhaw tlu chhe mek tundin nan an Ni pathian chu a ram mipui in pumkhat nan ‘State religion’ atan AD 274 khan a puang a. Temple thar a din a, chumi hlanna ni atan chuan kristianten krismas ni atana an lo hman thin Dec 25 ni luahlan nan Ni pathian hneh theih loh (Sol Invictus) birthday ni-ah a puang ve ta thuai mai a ni, tih hi Rom-ho history in a tarlan dan chu a ni. Chumi awmzia chu Rom hovin an ni pathian biakna ni atana Dec 25 an rawn hman ve hma kum 100 dawn lai kal tawhah khan Kristianten Dec 25 hi AD 200 vel khan Krismas ni atan an lo hmang tawh a. Khami hma khan Ni pathian emaw, Saturnalia – Saturn pathian emaw, Persia-ho MITHRA pathian emaw chawimawi nan Dec 25 hi an la hmang ngai lo.
Chu chu thil awm dan a nih laiin, a leha lingin Rom-ho tihdan Kristianten lachhawng ve angin thu a thang chho ta zawk hlauh mai chu, thu veivirtu an awm tihna a ni. Kristiante leh an Krismas sawiselna hi krismas dotuten hahîpa an theh darh duh dan a lo ni bawk si a. Mahse tunah chuan Krismas hi Babulon leh Rom-ho hnena mi copy chhawn ang leka dawtthu lo sawi chhuaktu – a kaikuang hi man chhuah a ni ta; tu nge a nih a hming leh a dawt sawina lehkhabu ngei pawh laihlanin a awm ta a ni.
Mithiam thenkhat atanga hnialna awm leh pakhat chu, beramputen thlasik laiin ramhnuaiah beram an riahchilh ngai lo, a huanga an khung lai a ni; chuvangin Isua pian lai hi December a ni thei lo; thal lai emaw, favang emaw a ni ang, an ti thin a. He hnialna phei hi chu a lo rinthu viau mai, tanchhan a nei chau hle lehnghal a. A chhan chu Bethlehem hi Israel ram chhim nisa lama awm, vûr tlakna khawpa vawt a ni lo. Beramte hi khawvawt tuar thei tura hmul chhah leh lum tak nei an ni bawk si. Beram huang hi Israel ramah chuan lung pala hung, khuh hulna mumal pawh nei nei lo a ni. Thlasik chhung zawngin beram rualte hi huangah khung ta se châwm a hautak viau ang. Helai, berampute ram tuanna hmun hi hman laia Boaza thlawhhma awmna hlui kha a lo ni a; Boaz’ Field an la ti reng. Bethlehem khaw mawng, mual pawng hmun rem tak a ni a; a chhungah hian pûk zau tha zet zet, beramte leh a vengtute riahna remchang tak, beram dah khawmna remchang tak a lo awm reng mai bawk a. Chuvangin thlasik khawvawtah beramputen beram an riahchilh ngai lo tia Isua pian hun Dec 25 sawi bona tanfung chu pheh thluk a har awm love.
Krismas Tree pawh hi Babulon milem betute chîn chhuahah bawk Hislop-a hian a puh leh a. Hei pawh hi rinthu leh suangtuahna thil bawk a nih hmel; a pian hma kum sang li dawn lai liam tawha Babulon-ho chin dan kha ziaka inhlan chhawn a awm bawk si lova, engtin nge a hriat bik, suangtuahna rama a phuah chhuah a nih ngawt loh chuan. Dik takin Kristianten Krismas Tree an hman thin chîng chhuaktu chu Reformer ropui Martin Luthera kha a ni tih a chanchin chiang taka chhui theih a ni thung.
Bible-ah krismas hman tur tih thu emaw, Isua pianni hi Dec 25 emaw, ni dang emaw a sawi lova, a lawm ve duh lo chuan lawm ve lo mai se a pawina ka hre lem lo. Keini misual bo hnute min chhandam tura Pathian Fapa hringmia a rawn chan ni hi a lawmawm em a, lawm nachang hriate chuan Lalpa chawimawina ni atan hlim takin Krismas hi i hmang zel ang u.
Kristiante zingah ngei pawh December 25 lo sawi sawptu an awm ve thei tho. A dik e, December 25 hi pathian biakin kohhranten kan be lo; ni dang ang ve tho a ni. Kan biak leh kan chawimawi chu hemi nia lo piang Isua Krista, khawvel Chhandamtu hi a ni. Keini Mizote kristian kan nih ve hma daih, kohhran chanchin kan chhut hlat theih ber AD zabi 2-na lai atanga December 25 hi kohhran hmasaten Isua pian champhaphak ni anga an lo hman hi kan chhunzawm ve mai a ni. Ni tin hian Isua rawng kan bawl thei e; mahse a tir atanga a birthday, Krismas ni kan lo hmanna ni chu December 25 hi a ni tlat a; a ni a lo thlen dawn a ringtute lung a tihlen zia leh Krismas hla lunglenthlak tak takin Zoram dung leh vang mai ni lo, khawvel pumin an ngaihsan zia ngaihtuah hian, he ni chawp hian ringlotute ang maiin kan sawi sawp ve dawn em ni?
Khawvel pawhin ni pawimawh bik – Independence Day te, Kumthar ni January 1 te leh kum tin Holiday ni bik kan hmang ziah a. Lei mihringa kan awm chhungin ni bik serhna ni Sunday te, Sabbath day te kan la neih chhung hi chuan ni bik pawimawhna hi sawi nep thei kan ni lovang. He khawvel chhandam tura Pathian Fapa meuh lei mihringa a rawn channa pawh hian ni bik a nei ngei a ni e. He Kristmas ni lawmawm kan hmuah mek, kum 2000 chhunga Kristianten Dec 25 hi Isua pian ni anga kan hman hi ringlotute ang chuan i hnial buai ve lo ang u. Lalpan malsawm theuh che u rawh se. Amen.