Lalchhandama Colney
Ph – 9862982321
-- Advertisement --
Kan hriat theuh angin inthlanpui kan hnaih ta, eng ang sawrkar nge kan neih leh dawn tih chu a hriat lawk theih der si lo va, kan Pathian erawh chuan a hre khiau ngei ang le. Ram dangte han thlir chuan an hmanlai hunah chuan sakhuana leh ram rorel hna hi a kal kawp mai thin. Mahse, khawvel alo changkang zel a, tun hnu hi chuan sakhuana hian hmun a nei tawh mang lo, ram hruaihna chu a hrang hlakin a kal a ni deuh ber tawh mai. India ram sakhaw chi hrang hrang awmna angah phei chuan ram rorel hna hi a hrang hlak a a awm ngei ngei a ngai a ni. Mizoramah pawh a dik tak chuan sakhaw tih bik kan neih hi a thiang lutuk lo a ni,amaherawhchu, Kristian kan tam ber a, a zul zuia kan kal chu a mek lem lo ve. Tun hma phei kha chuan rawngbawltute tih ve awm chi ah kan ngai lo hial zawk a ni. Tun hnu pawh hian duhthusamah chuan tel ve miah lo se, tih hi kan duh dan ala ni fur mai thei. Aw le, engpawh nise, rawngbawltu ka ni emaw ni lo emaw politics hian min huam vek tho avangin eng emaw chenah kan bengkhawn ve tho chu a ngai a ni.
Mizote Politics – Mizoten politics kan hmelhriatna hi Assam hnuaia kan awm lai, district council hun vel lai atang khan ti ila, kan tih sual em em ka ring lo. Political party kan neih hmasak ho-Mizo Union, P.C., Mizo Convention, MNF (Tun hma chuan MNF an la ti chiah lo) te hi ni hlawmin ka hria, an phak ang tawk tawkin an bei ve nasa thei hle. Inthlan dawnah motor-in kawng an zawh a, loud-speaker-in an au bawk a, an ri luai luai thin, vote lei leh hralh te pawh a tam thei hle. Sawrkar alo ding ta a, Minister ten dawrtu chi hrang hrang an nei a, a ti thei deuh chuan an len phah viau thin reng a ni. Sawrkar kan hmuh dan/dawr dan reng reng kha ram tan a ni mang lo, sum hmuh nan, hna hmuh nan, mahni inhaivur thur thur nan a ni deuh ber mai. Tun hnu hian MPF alo ding ta a, kan inthlan boruak chu a tha ang reng thin ta viau a, mahse, sawrkar kan hmuh dan, ro kan rel dan hi ala danglam hlei thei lo, a tawi zawngin, kan building a lian thur thur a, sawrkar erawh a rethei telh telh a ni.
Vaihote Politics – Kei aia hre chiang zawk tam tak in awm ka ring, mahse, vawiinah han sawi ve loh theih si lo va, ngaihdan tawk in lo nei mai dawn nia. Hnam upa an ni a, keini aiin kawng engkimah phuisui zawk tura rin an ni. An inthlan boruak hi a nasa thei hle mai, road show, rally, etc., an ti a, an phu lui lui mai thin a ni. Pawisate pawh hi an chelek nasa thin aniang, chumite campaigner car hnungah pawisa note crore eng emaw zat an man, tih te, kan lo hre thin. Tun hma deuh te phei kha chuan an campaigner thenkhat te phei chu an inphil deuh mai thin, case-te pawh hi an file nasa thei thin hle mai. Sawrkar an lo ding ta a, thenkhat chu nghet lo tak tak, mahse, khung Delhi sawrkar (AAP) te khu chu a ngialnghet hle mai. Vaiho zingah pawh sum duh tak tak, politician ho zingah pawh an awm ve nual mai. |hen khat erawh ramin a sawt pui, changkan phah em em an awm ve bawk a. A tlangpui thuin vaiho hi an tha ang reng viauin ka hria.
Bible Atangin – Bible zir, thiam tak tak in awm nual ka ring, kei hi chu zir ni lo, chhiar erawh chhiar ve zauh zauh thin ka ni, i’n lo bihchiang tlang dawn teh ang. Thuthlung hlui lam zawng han thlir hi chuan ram hruai hna kha puithiam ten an thawk nghal vek a ni. Lal Saula, alo lal atang khan ram hruai hna kha a kal hrang ve tan chauh a, mahse, puithiamte kha an la pawimawh vet vet hle tih kan hmu hlawmin ka ring. Thuthlung thar lamah hi chuan sawrkar leh sakhua kha an inhnaih tawh lo, a hrangin a ni deuh ber ang chu. Isua zirtirnaah pawh roreltute thu thua awm tur, mahse, roreltute pawh an chunga roreltu tur Pathian a awm thu a sawi. Chhiah chawi chungchangah pawh sawrkar thil chu sawrkar hnenah, Pathian thil chu Pathian hnenah, a ti deuh mai a ni. Politics hi Pathian thu anga kalpui theih lohna lai a tam ang, a chhan chu kan dan leh dun te keimahni siam a ni lo, a tawi zawngin Hindu pachal ho siam a ni tlat mai, hei vang hian thlir dan deuh kan neih te pawh a pawi awm lo ve.
Kan inthlang ve leh dawn, kan boruak hi vaihoin han hre ta se engtin nge min tih ang, “…kristian ram a ni maw,” an ti dawn nge, “Kristian ka bacha, batmas,..” min ti dawn. Kan tih theih tawk chu fel leh thianghlim taka inthlan kal pui a ni. Kristian kan nih angin kan auhla leh campaign-te mawi takin, chhuna awm angin. Vote-te pawh hralh mai lovin, mawi takin i thlak ang. Tun hun hi kan hmingthan theihna hun remchang a ni, hnam dangte mak tih leh sawi tling tur khawpin kan boruak te i siam ang. Kan tum phawt chuan kan ti thei, Pathian remtih zawng pawh a ni ngei ang. Chutia kan tih theih phawt chuan ringlo ten, “E, Kristian chu a tha,” an ti thei dawn a ni. Kristian state kan nih angin kan inthlan boruak leh politics vir vel pawh thain fel se, kan inhmeh hle dawn a ni.