Kristiante leh ram rorelna
Thla khat zet a liam tawh hnuah pawh Lai Autonomous District Council-ah chuan roreltu tur din fel theih a la ni ta lo va. Hei hi, kan hriat angin, member 25 awmna LADC-ah party mala sawrkarna siam thei an awm loh avangin, sawrkarna siam turin party hrang hrang an indawr kual mek a. Hriat theih hnuhnung berah chuan, party pahnih MNF leh INC te chuan Larsap hnenah sawrkarna an siam theih thu an thlen a; hetih mek lai hian, ZPM leh BJP tang dun chuan sawrkarna siam theih an inbeisei thu an lo sawi ve bawk a.
Nikum December ni 3-a inthlang LADC, bial 25 awmah hian MNF-in bial 8 la in, INC-in bial 7, ZPM-in bial 6, BJP leh independent-ten bial hnih ve ve an la a. Inthlan result hriat fel hnuah hian, inthlan laia thawk dun MNF leh Congress te hian sawrkarna siam thei khawp member an neih avangin sawrkarna an siam mai tura mipui lamin an ngaih laiin, thawhdunna chu Congress-in chhu chatin ZPM nen thawhdun tumin hma an la a. ZPM thuneitu sang lamin thawhdun an remtih leh tak loh avangin ZPM leh MNF hian thawhdunna tur thui tak an kalpui leh a, sawrkar ruangam tur pawh siamfel a ni. 2025 December 15 khan an hruaitu ZPM member T Zakunga chuan larsap hnenah sawrkar a siam theih thu a thlen a nih kha.
Hun a lo kal zel a, inthlan dawna thawk dun MNF leh INC te bawkin sawrkarna siam tumin hma an la leh mek a, ZPM leh BJP tang dun chuan ‘han tum chhin se la, sawrkarna an siam thei meuh ang maw?’ tih thlirin an lo thlir mek a. Hetia han ngaih mai chuan, MNF leh INC tangdun hi member 15 an nih avangin chiang taka sawrkarna siam thei an ni; mahse, ‘an siam thei meuh ang maw?’ tia lo thlirtu an la awm cheu mai!!
Mizorama district council-te inthlan boruak hi tunhma atangin a chiri thei hle a, ‘inthlan zawh hnuah politics a intan dawn chauh’ tih te, ‘chungu nung buk ang an ni’ tih tawngkamte hi a lo chhuah phah a. Hetiang boruak a thleng thin hian ram leh hnam hmasawnna tur thui tak a tihthuanawp thin avangin, thlir liam mai lova tihtawp dan leh her dik dan ngaihtuah hi a hun tawh hle. Sawrkarna siam thei an awm a nih chuan, Kristian kan nihna bosal thak khawpa engtin emawa lo chawh buai phet tum kher lovin, tha takin pawm thiam ila, chu chu ‘kristian ram’ tia hriat hlawh mite tihawm tak pawh a ni.