Inthlan vote chhiar hun sawn ngiatin NGO Coordination Committee (NGOCC) te’n Zirtawpni khan Kristian Ni Serh Humhalh Punkhawm an huaihawt a, “Election Commission of India-in Mizoram Assembly inthlanpui, 2023 vote chhiar ni atan Kristiante ni serh leh Pathian kan biakna ni, Pathianni (December 3, 2023) a ruat hi \ha lo kan ti a, pawi kan ti tak zet a ni,” tiin pungkhawmte’n resolution an pass.
“Election Commission of India (ECI) hian vote chhiar ni atan Pathianni a ruat tawh hi sawn ngei turin vawiina kalkhawmte hian kan ngen nawn leh a ni,” an ti bawk.
Raj Bhavan hmar lam gate bulah hun an hmang a, thusawitute’n Mizoram CEO (chief electoral officer) Madhup Vyas laka an lungawi loh thu an sawi chhuak; an chairman Lalhmachhuana, Central YMA president chuan Mizorama ECI palai Madhup Vyas-a’n ECI hotute hmu tura appointment an dilna pawh a ngaihtuahpui duh lo niin a sawi a, ‘Kal tawp rawh u min han ti a,’ tiin a lungawithlak loh thu a sawi.
MZP president H Lalthianghlima chuan, ECI-in Mizorama Chawlhni-a vote chhiar a awm tawh em tih an zawhna chu Madhup Vyas hian Serchhip by election vote kha Chawlhni-ah an chhiar thuin a lo chhang a, kha kha hrilen lai a nih thu a sawi tel duh si lo tiin a sawi. Madhup Vyas-a hovin Mizoram pum huap inthlan hmachhawn a ni tawh lo ang tiin a sawi bawk. MSU president Samuel Zoramhlimpuia pawhin nakkuma Lok Sabha MP inthlan chu Madhup Vyas-a hovin neih a ni lo ang tiin a sawi.MUP president Nghaklianmawia kaihhruaia hun hmanah hian NGOCC chairman Lalhmachhuana chuan, “Kan hnam, kan sakhua chhanhimna tura pungkhawm kan ni tih hi i hre leh ang u,” a ti a, “Kristianna hi Kristian rama a him loh chuan kan hnam pawh a him dawn em ni?” a ti.
Vote chhiar hun sawn tura an ngenna ECI-in a chhang miah lo chu pawi a tih thu a sawi a, ECI hian a ti lui a nih chuan party office-te pawh hawn loh ngam a ngai tiin a rawt. “A tling zawng zawngte pawhin certificate pawh la lo ngam ang u,” a ti bawk.
MHIP president Ngurmawii Sailo chuan, “Pathian \ih chunga mahnia ro inrelna ram kan nih a \ulzia min hriatchhuahtir zel rawh se,” a ti.
Mizoram Kohhran Hruaitute Committee vice chairman Rev Zionparmawia chuan Kristiante ni serh, Chawlhni leh Inrinni ni lova vote chhiar an duh thu a sawi a, October ni 10-ah lehkha an thehluh tawh thu te, November ni 3-ah an thehluh leh thu te sawiin, “Biak in inkhawm bak chu mipui punkhawm loh ni se…” tiin a ngen a, party office pawh hawng lo turin a ngen bawk.
Kristiante ni serh humhalh tumin pungkhawm Mizoram CEO laka lungawi loh thu au chhuahpui
Get real time updates directly on you device, subscribe now.
Prev Post
Next Post