KTP GEN. CONF. VAWI 61-NA SAITUAL-IN A THLENG DAWN TA

Upa Dr. Lalsiamhnuna

Saitual Khawpui hian K|P General Conference tum thum – 1966, 1976 leh 1992-ah te khan hneh takin a lo thleng tawh thin a, tuna a thlen leh tur, VAWI 61-NA, February ni 26 – March ni 1, 2026, hi a thlen tum lina tur a ni.
Mikhual an tam dawn:
Tun hma lam deuh kha chuan Inkhawmpui Lian dawn kha, Pandal sak hna bak, mikhual dawnsawn leh thlen in chung changah thil hautak lutuk a awm lem lo. Tunah erawh ramin hma a sawn a, kawng a that tawh avangin chhak, thlang, chhim leh hmar, Zoram hmun tina mite kan inkal pawh zung zung thei tawh a, Lirthei ni se, a te ber atanga a lian ber thlengin kan kawl fir fer tawh bawk nen; Inkhawmpui hun tur lah, boruak nawm vanglai tak, vawt lutuk lo, lum lutuk bawk si lo; a hmun lah lirthei chi hrang hrang, a lian a te, ke pahnih nei thlengin, duh hun huna thlen theih, hmun hla leh hnai a awm te tan pawh, pan nuam tak vek ni bawk si, chu achhapah, Saitual khua hi Lal Dorawtan KRISTIAN KHUA atan liau liauva a din a nih miau avang leh Mizorama Dil hmingthang –TAMDIL leh pipu sulhnu chi hrang hrang: Thapui-Chhip-Tlang, Lung-au, Mualzavata tah-reu, Chhura lung kawh, Lalruanga chhum halna, Fiangpuilala Biate ‘Rulchawm-Kua’ awmna te, Pasaltha ‘Vanapa Khawthlir,’ Saihmar Tlang te leh Mizo Novelist Hmasa ber Tv. L. Biakliana, Mizo Historian Pastor Liangkhaia fapa tual lenna thin, a ‘Lungphun’ leh ama ‘ruh ro ngei an zalhna’ hmun te a nih bawk avangin thu leh hla lama tuimite tan ngat phei chuan kal a chakawm leh zual ngei ang.
Pawimawh em em, min hip khawmtu tur ber erawh chu Inkhawmpui Thupui- PATHIAN TANA MI HLANG (Sam 119:1-3) tih leh Speaker tur Rev. P.C. Lalropuia a ni ngei ang. Amah hi Pathian mi hman, thlarau mi tak, tunlai thalaite natna leh chhungkaw hri vei, depression, panic, anxiety, ldt. avanga mangang ten an pan huai huai thin kha a ni. Vanglai hun hmang mek nula leh tlangval sing tel teh meuh ten tih tak zeta thuchah ngaithla a, Pathian faka an han zai tur mawlh mai hian a hun thlen hlan min nghahhlelh tir. Solo leh special item dangte pawhin mit leh beng an titlai ngei ang. Chuvangin, tun tum |halai Inkhawmpui Lian zet hi zawng a nep thei lo hrim hrim.
Saikhawpui a inbuatsaih mup mup:
Saitual hian K|P General Conference, 2026 an dawng dawn tih an chian atanga remchang hmasa berah Organizing Committee din a ni a, Bialtu MLA/Minister te dawrin kawng hrang hranga hma lak a ni. Sawrkar leh khawtlang hruaituten theih tawp an chhuah avangin khaw chhung inkalpawhna kawng pawhin hma a sawn chak hle. Chhung tin te lo inbuatsaih dan tur leh tan an lo lak dan tur kaihhruaina pek an ni bawk a, kawng tin rengah hmasawnna hmel hmuh tur a awm.
Mikhual thlen an chak, palai tan a phurawm:
K|P General Conference vawi 60-na, 2024 dawngtu Ngopaa mikhual tam dan leh an dawnsawn dan engkim hre chung leh Saitual chu Ngopa aia Aizawl hnaih zawk a nih avangin mikhual pawh an buk zawk fe ang tih ring chungin, mikhual sawmli, sawmnga chu sawi loh, za tel teh meuh thlen inhuam leh thlen ngei tum an thahnem khawp mai. Mi fel Joba dungthulin, “Mikhualte kawtthlerah an riak lo vang a, an tan kawng kan hawng reng dawn, lo kal zel rawh se” an ti a ni ber (Joba 31:32). A engamah hmain, hmun hla leh hnaia awm, mikhual leh khawtual, thenawm khawveng te, Kohhran Pawl hrang hrang te nen lam, kan tang tlanga, kan inpumkhat em em a, Tlang Thianghlim nun kan tem tan chu a ni ta der mai. Chu tih mek laiin, mi thenkhat tan mikhual thlen hi a huphurhawm mai thei bawk, a awm tho ve; mahse, i huphurh lo vang u. Hmeithai rethei ve tak, Elisa lo mikhualtu, an chhungkaw sahriak tipunga an leiba zawng zawng rulh sak a, an intun nunna tur nen lam tihsak vektu Pathian khan min pui dawn alawm. Inkhawmpui kan han zo mah anga, taksa leh thlarauvah kan hlawk ngei ngei ang.
Chutih rualin, zak zeh nei, K|P kawra hmang, zu leh ruihtheih thil paipawn reng, chawhpawlh nuna nung, Pathian beisei tak tak si lo kan lo awm palh hlauh erawh chuan, a pawi khawp ang. Chung mite tan chuan lo inthiarfihlim mai a that hmel. A chhan chu, miten Pathian faka hlim taka hun an hman lai leh dam chhunga Pathian tana mi hlang nih tuma an nun an hlan mek laiin Police lal, kawr uk ha te thu peka Pindan Awm-khauh (Lock –up) chhungah an chaw pek nghaka an lo thut ran mai chuan, zan khat lek pawh rei an ti viau ang. Sim duh tak tak tan erawh chuan he hun hi hun tha ber a ni thung.
Saitual Town mipuite u, i zam lo vang u:
Kan lamah Lalpa a tang e. |awngtai Pawl te ruahmannain he Inkhawmpui Lian pual hian a kum a kum, Kohhran ho ten Van Pathian kan au tawh a, kan la au mek zel. Min chhang ngei ngei dawn. Ringtute tawngtaina Lalpan a hawisan rei ngai lo. Hebrai ziaktu chuan,”Mikhualte chungah that chhuah theihnghilh suh u; chutianga tiin thenkhatten hre lovin vantirhkohte an thleng si a (Hebrai 13:2) a tih kha. Zoram dung leh vanga thalai rual, ‘Isua neih ka duh zawk, thil dang zawng aiin,’ ti ngam ngat, ‘Pathian tana mi hlang,’ nih tum, sing tel fuan khawmna Lalpan a hawisan thei lo ang, a hawisan dawn lo hrim hrim. A vantirhkohte in thleng dawn. Mikhual leh khaw tual tan Lalpan malsawmna a dah teuh tih i hre reng ang u.
Thil mak a thleng ngei ang:
Chhangper panga leh sangha pahnih lek hmanga a thusawi ngaithlatu mipui sangnga zet puar taka hraitu khan, a Thutak ngaihthlak tumtute leh lo mikhualtute inpekna leh insensona zawng zawngte Lalpan a tithlawn lo vang tih i ring tlat ang u. Mak deuh mai chu, Pathian mite lo mikhualtu ten malsawmna an dawng tlat zel thin hi a ni. Abrahama te nupa-in Lalpa mite tha takin an lo dawngsawnga, tar hnu-ah fapa pek an ni a, Rahabi nawhchizuar pawhin enthlatute a lo mikhual avangin an chhungkua chhiatna rapthlak tak lakah chhanhim an nih phah bawk. Tirhkoh Petera pawhin mikhual thlen hi malsawm dawnna hnar a nihzia hria in, duhsak takin, Kohhran hote hnenah, “Phunnawi lovin inmikhual tawn thin rawh u,” (I Petera 4:9) a tih lawm lawm kha.
Hawh u, Lalpan thil ropui tak min tihsak tur beiseiin K|P GENERAL CONFERENCE VAWI 61-NA, SAITUAL-in a dawn tur hi hlim takin i hmuak ang u.