Mizoram Presbyterian Kohhran thalai chuan nasa zawkin ruihhlo do an tum a. Aia upa zah inzirtir an tum bawk.Ngopa-a neih KTP General Conference vawi 60-na chu a tiak a. An thurel zingah – ruihhlo do kawngah nasa zawkin Central KTP-in hma la rawh se, an ti a. KTP member mipa ruihhlo leh a kaihhnawiha vanga thi an tam lutuk a lo tlem zawk nan hma lak rawtna pawm a ni. Aia upa zah inzirtir kawnga hma lak rawtna pawh pawm a ni.
Central KTP kumpuan thupuiah ‘Zirna leh rawngbawlna’ tih pawm a ni a. Mamit bial leh Mamit Hmunsam bialin 2028 KTP General Conference thlen an dilna pawm a ni.
Kum 2024- 2025 budget atana ruahman Rs. 71,50,000 pawm a ni bawk.
Rorel inkhawm neih hma in 2024- 2026 chhunga Centrak KTP hruaitu thlan a ni a, thlan tlin tak mi 25 atangin office bearers tur ruat an ni.
KTP General Conference-ah hian palai inziaklut mi 25000 chuang an awm a, in report lem lo pawh engemawzat an awm tih sawi a ni. Inrinni zan, Pathianni chawhma leh chawhnuah conference thupui ngaihthlak a ni a, thupui hi “Midang tana malsawmna” (Genesis 12:2) niin, speaker chu Rev Dr H Vanlalruata a ni. Pathianni zan khan Central KTP leader kalchhuak tur Rev Dr F Pachhunga’n thu a sawi a ni.
Inkhawmpui khualchhawntute chuan lirthei kal zat hi a tirah chhinchhiah mah se, lirthei thleng a tam avang leh thlen hunbi a inan loh avangin an chhinchhiah zui tawh loa, a zat hriat a ni lo tih an sawi.
KTP-in ruihhlo do nat tum Aia upa zah inzirtir dawn
Get real time updates directly on you device, subscribe now.