Kuhva chingtuten kudam veng zawk se a him ang – Congress Thalai

Dan loa kuhva ro tawlh chhekkhawlna kudam, thuneitu lamin an hmuhchhuah tawh a bo leh thei chu mak an tih thu Congress Thalai chuan sawiin, sawrkar ni lo, kuhva chingtu pawl lamin heng kudam hi enkawl zawk se a him an ring tih an sawi.
Congress Thalai Hqrs. hruaitute chuan Thawhtanni khan Kolasib district-a kuhva chingtute dinhmun leh tunhnaia Vairengte chhehvela foreign kuhva smuggling kudam-a dah kuhva ip a ruka lak bo chungchang chu a hmunah an enfiah.
Mizorama kuhva chingtu, an thawhrah hralh hleithei loa an awm chu pawi a tih thu Congress Thalai senior vice president Ngurdingpuia Pachuau chuan a sawi a. Dan loa kuhva tawlhrutute avanga harsatna an la tawk reng leh, sawrkarin mumal taka action a lak ngam loh avanga Vairengte, Bilkhawthlir leh Hachhek biala kuhva chingtuten mahni ram ngeia chanvo nei ve loa an inngai hial chu lungchhiat thlak an tih thu a sawi.
Kuhva Chingtu Association leh Kolasib SDPO hoin Myanmar atanga kuhva tawlhruk dah khawmna kudam an endiknaah kuhva ro bag 9635 stock a awm tih hriat a nih laiin, a hnu lawkah ip 5741 chuang a bo chu ZPM sawrkar rintlak loh zia tilangtu a ni tih a sawi a. MNF sawrkar laiin kum 2022 khan Myanmar atanga lo lut kuhva rah an man bag 4522, kudam-a dah, kalh hnan thlap chu ip 1302 a lo bo tawh bawk tih sawiin, “Hei hian ZPM leh MNF sawrkarah danglamna a awm loh zia a tichiang a ni,” a ti.
“Kuhva ip heti zat a bo thei hian dan kenkawhna lama ZPM sawrkar hlawhchham zia a tihlan bakah sawrkar thuneitute leh kuhva tawlhrutute inthurualin, suma inthamkualna a thleng ni ah kan ngai a. Home minister ni ta Pu K Sapdanga’n kum 2022-a a sawi leh chanchinbua tihchhuah, ‘Kuhva tawlhruknaah hian kan mite an tel ve tih kan pha lo…’ a tih avangin, kudam-a kuhva ip 3894 la awm pawh a bo leh mai kan hlau a, sawrkar ni lo, kuhva chingtute zawkin kudam hi enkawl se a him kan ring,” Congress Thalai hruaitu hian a ti.
Congress sawrkar lai khan kuhva chingtute ngenna angin, chief minister Pu Lal Thanhawla khan kuhva tawlh chu a titawp vek tih sawiin, MNF sawrkar kaltaah khan kuhva tawlhruk chu nasa taka tharthawh a ni a, ruihhlo pawh nasa takin a hluar nghal a, midang aia danglam bik tura inzuar ZPM sawrkarah kuhva leh ruihhlo tawlh chu a hma aiin a hluar zel a. Home minister-in smuggling thil thla khat chhunga tihtawp a tum thu a sawi chu dawt, lemchanna leh media chakna hmanga intihlar tumna satliah maiah an ngai tih a sawi a ni.