Kuhva dahna kudam hmuhchhuah thar a ni – MNF Thalai

Tunhnaia dan loa kuhva tawlh hmuhchhuah a nih hnu ah, Vairengte IOC Vengah hetiang kuhva bag 2000 dahna hmuhchhuah thar a ni tih MNF Thalai chuan an sawi.
MNF Thalai Hqrs. hruaitute chuan Inrinni khan Bilkhawthlir kuhva chingtute duty post, tunhnaia Phaisen Venglaia dan loa kuhva rah tawlhruk chheprelh an man chhuahna hmun, thuneituten kuhva rah an man sa bag 5849 bona Vairengte kudam an tlawh a. Vairengte IOC Veng kuhva bag 2000 chuang awmna kudam hmuhchhuah thar an tlawh bawk.
MNF Thalai vice president Lalnunmawia Pautu chuan, kuhva ro bag 2000 hmuh chhuah thar leh Vairengte kudam-a kuhva bo bang bag 3786 chu bo tawh lo se an duh tih a sawi a. ZPM sawrkar hnuaia kuhva man tawh sa tam tham tak a bo chuan ZPM thuneitute an inrawlh a rinhlelhawm hle tih a sawi.
ZPM sawrkarin thla khat chhungin kuhva ro tawlh nuaireh an tum laiin, a hluar zawk emaw tih tur khawpin kuhva tawlh a nasa a. Chulai karah kuhva rah man bag 5700 chuang a bo zui leh hian ngaihtuahna a tithui, tiin, hemi kawngah hian tanruala thawh ho a tul a. Kuhva chingtute an thlawp tih hriatpui turin an duh tih a sawi.
Bilkhawthlir Kuhva Chingtu Co-perative Society chairman chuan Hachhek biala kuhva chingtute nen an han tang deuh a, hma an sawnin an hria a. Vairengte leh a chhehvela kudam hi awm lo se, thiat vek se, an kuhva tawlh dahna tur an nei lo anga, chutiang tur chuan sawrkarin hma la se, hma an sawn an ring tih a sawi a ni.
MNF Thalai hian Phaisena mimal ina kuhva bag 687 awm chu him lo nia hria in, senghawi thuai turin sawrkar an ngen tih an sawi bawk.
‘ZPM sawrkarin a duhlo viau na in, mithahnemngaite PIL avanga High Court-in dan loa kuhva ro tawlh chungchang CBI chhui tura a dah ta hian High Court-in Mizoram sawrkar a rin zawh loh zia a tilang a, High court thutlukna hi lawmawm kan ti hle a ni,’ MNF Thalai Hqrs. thuchhuak chuan a ti.