Kuhva man sa lilama hralhnaah thuneitu sang zawk inrawlh ring

Kuhva man sa lilama hralhnaah
thuneitu sang zawk inrawlh ring
Kolasib district leh Mamit district-a kuhva chingtu pawl hrang hrang chuan Kolasib-a dan loa kuhva tawlhruk man sa lilama hralhnaah district thuneitute phena kuhva smuggler-te samphiar zawm sawrkar thuneitu sang zawkte ruahmannaah an ngai tih an sawi.
Vairengte Kuhva Chingtu Co-operative Society, Bilkhawthlir Kuhva Chingtu Cooperative Society leh Hachhek Bial Kuhva Chingtu Pawl (VBH) Joint Committee thuchhuak chuan, ramdang kuhva man sa, Kolasib district magistrate-in lilama a hralh chungchangah kuhva tawlhru thinte thil tum leh duhthusam anga rorelna kalpui a ni tih an sawi.
Dan loa kuhva tawlhru thinten an kuhva man sa hi ukil ruaiin lilama tiral turin thuneitute an lo sawipui tawh thin a. Hei hi tihpuitlin a nih chuan Mizorama kuhva chingtute tan a him dawn lo hlea hriain thuneitute hnenah an lo sawi tawh thin tih an sawi a ni.
‘Dan loa kuhva tawlh thin hian Mizoram kuhva market a tih buai em em lai a, hetianga kuhva man sa lilama tihral a nih chuan kan market a chhe lehzual dawn. Kan kuhva thar chhuah hralh hun hi thla reilote chhung chauh a ni a, hetianga kuhva sawngbawl sa leh dan loa ramdang atanga tawlhruk, man tawh lilama hralh theih a nih chuan, kumtluanin kuhva tawlhrute kawng hawnsaknaah kan ngai,’ a ti
Kuhva tawlhru thinte hian Mizoram sawrkar kuta luhtir a, lilam hmanga leichhuah leh mai chu an thiltum an sawi fo thin a ni tih a sawi bawk.
Tun hnuah ramdang atanga danloa kuhva tawlhruk man sa lilam hmanga hralh tawh lo turin thuneitute an ngen tih Joint Committee hian sawiin, ‘Kuhva lilam leitute, a leitu tur an thlan dan leh lilam chhangtute hming leh an leina rate puangzar turin sawrkar kan phut a. Restricted tender anga auction kalpui hi a himlo a, kuhva tawlhru thinte hian anmahni hming langloin an leichhuak leh zel thei dawn tihna a ni,’ a ti.
Kuhva man sa tih riral dan tura district magistrate-in an buaina a sawi chu chhuanlam tlingah an ngai lo tih an sawi a. Phumbo na tur an duh a nih chuan kuhva chingtuten ram an ngaihtuahsak thei a, halral an duh pawhin sawrkar sum sen ngailo leh envirommental issue buai loin an halral sak thei reng tih thuneitute an hriattir tih an sawi a ni.
‘Kuhva chingtuten hah taka kan man leh kan report atanga police-in an man sa tih riral dan tur relhonaa sawm kan ni ve lo hian tih riral dan turah tum lawksa an nei tih a tichiang a. Sawrkarah beiseina sang tak kan neih laiin, thil la thleng ngai lo, kuhva man sa lilama hralh a ni hi district thuneitute phena kuhva smuggler-te samphiar zawm sawrkar thuneitu sang zawkte ruahmannaah kan ngai,’ a ti.