Kuhva ro man sa ‘auction’ hnuah Silchar lama phurhchhuah a ni

Kuhva ro man sa ‘auction’ hnuah
Silchar lama phurhchhuah a ni
Mizoram kaltlanga ramdang atanga dan loa kuhva rah ro man sa dahkhawm chu court thu angin Kolasib district thuneitutue chuan ‘auction’ in, a chhangtu Silchar lam mi chuan April 18 khan a phurchhuak tih sawi a ni a. Hemi kaihhnawih hian inhnialna a siam nghal.
Thudawn danin, tunhnai khan Kolasib district thuneitute chuan court phalna an hmuh angin Thingdawl Polytechnic building-a dan loa tawlh kuhva rah man sa an dahkhawm chu auction a ni a, a chhangtu hi Silchar lam mi sumdawng nia sawi a ni.
He thu hi hriat a nih veleh April 18 khan a hmuna kalchilh an awm a, truck panga hmangin kuhva man sa dahna Thingdawl Polytechnic building atang hian phurhchhuah a ni a, truck pahnih chu an kal hman nia sawi niin, truck pathum erawh a lo la kal hman lo a ni.
Thudawnna sawi danin, Thingdawl Polytechnic building hi luah loha awm reng hi luah tum niin, cheithat a tul a; kuhva rah an man sa hi dahna tur dang an hriat chuan loh avangin auction-a, a chhangtu hnena pek mai tura tih a ni.
Hemi chungchangah hian district bawrhsap chuan a mi rawn zingah Sub Hqrs. YMA Kolasib leh MJA Kolasib District pawh an tel a, April 15 khan an inkawm. An ni hi chuan dan loa man tawh hetianga tih ral ngawt chu tha an tih loh thu hi tawngka in bawrhsap hnenah hian an sawi ve ve tih thu dawn a ni.