Kuki-Chin-Mizo-Zomi-Hmar tan inrelbawlna hran dil

Manipur-a Zo hnahthlak MLA te’n India ram home minister Amit Shah hnenah lehkha an thehlut a, Manipur-a Zo hnahthlakte tan inrelbawlna hran din ni se tiin an ngen. Tunlaia Manipur buaina chu tum reng vang tiin an sawi a, he thilah hian Manipur chief minister leh sorkar an puh. Kuki-Chin-Mizo-Zomi-Hmar te’n Manipur-ah tihduhdahna nasa tak an tuar tih an sawi a, hei hi fel fai taka thlentir niin an sawi bakah, Manipur sorkar leh an police te’n tlang mite’n tha an thawh niin an sawi.
Imphal-a Zo hnahthlakte tuarna chungchangah, a hmain Meitei-in survey leh mapping te an ti sa vek a, chumi titute chu Arambai Tenggol leh Meetei Leepun te an ni tih hriatchhuah a ni an ti a, Manipur chief minister N Biren leh Meitei Maharaja leh Manipur MP Leishemba Sanajaoba te uapna hnuaia chutiang chu ti an nihzia finfiahna photo evedence pawh a awm tih an sawi.
May ni 3-a Meitei-hovin Churachandpur-a Anglo-Kuki war memorial gate an hal avanga buaina hi intan a nih thu an sawi a, ruahman sa vek a nihzia chu, Manipur Police-a Kuki officer-te, DG/Addl DG/Jt DG atanga Kuki constable thlengin, May ni 3 hma hian thuneihna leh ralthuam chhuhsak phawt an ni a, chutih laiin Meitei police te erawh Imphal leh tlang ramah zalen takin an che si tiin an sawi.
Chutiang karah chuan ngaihdan dang an nei thei tawh lo a, May ni 12-a thuchhuah an lo siam tawh ang khan Kuki-Chin-Mizo-Zomi-Hmar MLA-te chuan inrelbawlna hran dinsak turin sorkar laipui an ngen ta a ni tiin an ziak.
“Kan mite’n Manipur sorkar an ring tawh lo a, a him lohzia an hriat avangin phaizawla cheng ve tur ang pawhin an suangtuah thei tawh lo. Meitei-te hian min hua a, min zak hek lo,” an ti a, “Kan mite awmna tlang rama inrelbawlna hran din inlak hran mai hi tuna kan mamawh chu a ni,” an ti.