Kum 2018 hnua a vawi khat nan US leh Iran inbia

Kum 2018 hnua a vawi khat nan US leh Iran inbia
Iran leh US chu kum 2018 hnua an mi pawimawh inbiak hmasak ber nan Tehran-in nuclear programme a neih chungchangah a thawh khat nan Oman-ah an inbia.
Ram pahnihte hian Inrinnia inbiakna hi ‘a boruak a tha’ tih sawi ve vein tun karah a vawi hnih nan an inbiak leh tur thu an puang a. US chuan ‘hmaichhana inbiakna’ chu inremna a awm theihna tura thil pawimawh tak a nih thu a sawi tel.
President Donald Trump-a hi kum 2018 khan Iran leh ram lian dangten nuclear agreement an siam atanga inhnukdawkin inremna ‘tha zawk’ siam a nih tur thu a lo sawi tawh thin.
Tun tuma an indawrna hi president-in inremna a sawi thin bul tanna tura pawimawh taka ngaih a ni.
Darkar hnih leh a chanve inbiakna hi a rei lo va, inzahtawn takin an kalpui a, vawi hnih inbiakna tur an ruahman bawk.
Iran-a indawrna tura buaipuitu ber, Foreign Minister Abbas Araghchi pawh a lawm hle a. “Ka ngaihdanah chuan vawi khat inhmuhnaah chuan a tha a, muanawm leh inzahtawn taka thil tih a ni a, tu mahin tawngkam tha lo pawh hman a ni lo,” tiin Iranian sorkar TV hnenah a sawi.
Trump-a palai, Steve Witkoff-a kaihhruai US team hian a hmaa president-in Iran a lo vau tawhna tawngkam pawh an hmang lo niin a sawi a. A hmain president hian Tehran-in inremna a duh lo a nih chuan bomb-ah vauin an dinhmun chu a chhe hle dawn tih a lo sawi tawh.
Inbiakna hi team pahnihte hi pindan hranah awmin Oman Foreign Minister Badr bin Hamad al-Busaidi-a’n an sawi duh a hrilh chhawng zel a. Witkoff-a chiahin US aiawha kal zingah Iranian aiawhte a hmu.
Araghchi leh Witkoff te pawh hi Busaidi awm laiin reilo te chauh an inbia a, US thuneitute chuan an duh ang taka hmaichhana inkawmna tling lo mah se bul tanna atan chuan tha tak niin an sawi.
Inbiak zawh hnuah White House chuan thil lawmawm tak a nih thu sawiin Witkoff-a hian Iran hnenah hian an inmil lohnate chu ‘inbiak leh palai intirh kaltlanga chin fel theih’ a nih dan a sawipui tih a puang.
An inbiak hma hian Araghchi-a chuan an ram chuan ‘inremna fel fai leh tha tak’ an duh tih a sawi.
An inbiak zawhah hian inbiak leh chu Oman-ah a ni tawh dawn lo va; mahse, Middle East ramin ruahmanna a siam tho tur a ni dawn tih puan a ni a. White House chuan Inrinni a ni dawn tih a sawi tawh thung.
US leh Iran inbiaknaa an sawi lian ber chu Tehran-in nuclear a kalpui danah thil hlauhawm a awm lohna tur a ni a. Thla hmasa khan Trump-a’n Iran-a supreme leader chu United Arab Emirates kaltlanga lehkha thawnin Iran chu nuclear ralthuam a neih loh a duh thu leh chu chu US leh Israel atanga beihna a tawh lohna tur a nih thu a hrilh.
Iran hian nuclear programme a neihte chu khawthlang ram lianten an hrek mekna an hlih phahna tura hman a tum ve bawk.
Trump-a hian kar kal ta Thawhtannia Benjamin Netanyahu-a’n White House a tlawh tumin inbiakna an neih tur thu hi a puang a. Israeli prime minister pawh hian an ram hnihin Iran-in ‘nuclear ralthuam a neih loh’ an duh ve ve tih a sawi bawk.
Khawthlang ramte hian Iran-in nuclear a sawngbawl hi ralthual siam nan a hmang ang tih an hlau va, anni erawh chuan chu muanawm taka kalpuiin vantlang thatna tur zelin an ti niin an sawi ve thung.