Kum 2024 Kan Thleng!!

Lalchhandama Colney
Ph – 9862982321

Kan hun pui Krismas leh Kumthar kan hmang zo, a thente chuan ruai pawh puar peng pawngin kan theh ngei ang, thlarau lam ruai pawh hlim tak leh hlawk taka theh kan awm teuh bawk ka ring. Vawiinah hian tute nge kumthar chu thleng hlawm ta le, hlep ruk hmang, Pathian thu kawra hmang thin te, mi tha tak tak, rinawm tak tak, taima tak tak te kan ni hlawmin ka ring. Pathian hian ang khatin Ni a chhuah tir a, a tlak tir leh thin a ni. Mi tha tak, fel tak, damrei ta mang lo, mi sawi luai luai khawpa rinawm lo, mi tha lo tak, malsawmna (?) dawnga hmuingil ta riau te kan hre thinin ka ring. Eng nge a chhan ni ang le, Pathian hi a awm tak tak lo aniang a? Nge, Pathian hian alo hriat sual palh hlauh ni ang. Aw le, engpawhnise, vawiina mi zawngte hi chuan kumthar chu kan thleng phawt mai le. Roreltu kan ni lo a, thuneitu pawh kan ni lo ve, Pathian rorel dan lo sawisel ve ngawt mai chu, a thil siamte kan ni a, a tih chi awm lo ve.
2023 Thlir Let Ila – Kan hria anga kum khat chhung hian ni tam tak, kar tam tak, etc., a awm a ni, hetih lai hian thenkhat chuan tukina kan chawhmeh pawh kan hre mumal leh tawh lovang a. Kum tluan maia kan nun dan, tihsual, thil tihthat, etc,.han hre leh kilh kelh tur chuan a huphurhawm duh mai thei. A hriat awlsam ber tur zingah chuan Sunday school i kal kim em, kum khat chhung hi rei ve tak a nia, Bible pawh chhiar chhuahna hman zan a ni, thuthlung thar bu tal i chhiar chhuak em?
Thuthlung hlui hunah kha chuan uire chu lunga den hlum tur a ni, Isua chuan- ngaih chaka melh/rilru pu tawh phawt chu a uire a ni, a ti. Vantlang, kohhran lama hriat si lovin mi nu/pa, i lo uire reng tawh lo maw, kei pawh hi Pathian, rilru leh thinlung zawng zawng hmutlangtu hmuhah chuan fihlim lo tlat mai. Engpawhnise, hun kal tawh an ni a, koh kir theih tawh loh, siamthat theih tawh loh, inennan/darthlalang atan erawh tangkai takin kan hmang thei.
Hma Lam Thlir Thung Ila – Kan hriat theuh angin kan hma lam hun second khat, minute khat, etc., lek pawh hi kan thu a ni lo va ni. Tukina chhum zing chuai chuai te kha tlai lamah chuan alo bo leh vek tawh a, dam tha takte pawh kha natna eng emaw takin min man thut thei a ni. Naktukah chuan chu chu ka ti ang, karlehah chuan chu chu ka ti leh ang, kan ti ngawt thei lo. Amaherawh chu ruahmanna, thlir lawkna, etc., ang chi te erawh kan siam thei, kan tih tur pawh a ni, pawimawh tak a ni, mahse, kan hlawhtlin tir thei lo, a ti theitu chu Pathian chauh a ni. Kan dam anga kan ni tin hna chi hrang hrangah te eng eng emaw kan tawngin kan tawk leh ang, natna, damlohna, thihna hial te pawh kan tawk mai thei, hengte hi a hun lai chuan tawrh har/hrehawm tak a ni thin. Kan hriat ve reng tur erawh chu mite paw’n an tuar, keimahni chauh kan ni lo, hringnun kalphung, zirlai tha tak min zirturtu an ni thei a ni. Sawi tawh angin hma lam hun hi a sawi lawk tak tak theih loh a, hlim tak leh a tha thei ang bera hman tum chu duhthusam a ni ngei ang.
Dam Chhung Tawite – Mithiamte chuan khawvel hi kum maktaduai eng emaw zata upa a ni tawh, an ti, hetih lai hian kum engzat nge a la daih dawn, tih erawh hi chu sawi a harsa khawp ang. Tunah khan kum 45 i ni a, i pian hma khan khawvel hi kum tam tak a lo awm tawh a ni, kum 85 vela thi tur angin lo inchhut ta la, chu mi hnuah pawh chuan khawvel chu kum tam tak a la awm dawn a ni. Khawvela i hun hman chhung chu kum 70/80 vel chu lo ni ta se, a rei i ti nge ti lo aw, a dik tak chuan kan damchhung nite hi a rei lo a ni, chhum rei lo te lo langa ral leh ang mai, an tehkhin a ni. Hmm,..kan dam chhung chu a rei lo ngei mai, mahse, mite chuan khawvel awm chhunga reh thei tawh lo turin an hming kan chher tlat, chungte chu mibik deuh te tih theih chauh alawm kan tih ka ring. Nia, a ni ngei a, mahse, thamna i lak loh mai khan, pawisa i ziah bo loh mai khan, i Pathian thusawi anga nangmah paw’n i tih zel khan, mite thinlungah, ka thinlungah thu a sawi a ni. Kaa sawi hi chu bengah a lut a, lehlamah a chhuak lehnghal a, chetziaa sawi erawh mite thinlungah a riak reng tawh thin.
Thu tha tak tak ziah, sawi hi chu kan thiam tlang viauin ka ring, a zawm tak tak, nunpui tak tak tur chuan, mi pangngai lo deuh, mawl, rethei, etc.,te nih ngam a ngai, khawvela cheng kan ni miau a, a thei leh thiangzau deuh ten ngaihhlut leh chawimawi an hlawh zel si chuan, kan khawvel, Zoram khawvel chu, kawtthlera awrawl tawp tawpa hnehna hlado chham vak vak pawh hian awmzia a nei thui hlei thei lo a ni ber mai. Aw le, kan sawi tum lamah han lut leh ta ila, Krismas leh Kumthar kan hman danah kan lungawi tawk em, result tha lo tak nei turah chuan inngai lo ila. Hmang thleng leh thei tur chuan hun rei tak nghah leh a ngai, chu pawh chu engtin nge kan awm dawn pawh kan hre si lo va. Kumthar thutiam neih te hi thenkhat chuan kan ti thin a, a tha viau a, mahse, kei hi chuan vawi khat mah ka neih awm hi ka la hre lo, chutih lai erawh chuan chunglamin rem a ti zel a nih chuan kum tin Bible chhiar chhuah erawh hi chu ka tum, kumthar 2024,chu kan thleng, a lawm nan Chibai vek u le.