Rev Dr Ramengliana
-- Advertisement --
Kum tina lo thleng thin Khuangchawi thla Pathian ni vawi thumna hmangin NEICC |awngtai Rual ni chu naktukah hian a lo thleng leh dawn ta a. He hun hi NEICC tan a pawimawh em em a. Chumi awmzia chu India hmarchhak kohhran inpumkhatna atan a pawimawh tihna a ni a. Hemi ni hian NEICC hnuaia kohhran member 37 te leh Kristian pawl 18 ten thu khat vuain Pathian hnenah an mamawh an thlen hovin chung lam an au ho thin a ni. Chumi rual chuan NEICC rawngbawlna atan thilpek an la khawm thin bawk a. Chung thilpek tling khawmte chu NEICC rawngbawlna kawng hrang hrangah tangkai taka hman a ni thin a ni.
North East India Christian Council
NEICC hi pawl hlun tak, 1937 daih tawha din tawh kha a ni a. Khawthlang lam atanga lo kal sap missionary tam takin helai hmuna rawng an bawl laia an hmalakna pakhat a ni a. Mission tam tak insu deuh nuai nuaia awm tur kha tha an ti lo ni tur a ni. An din tak Council atang chuan kawng hrang hrangin North East-a ringtute tan a thawk ta a ni ber a. A tir chuan Assam Christian Council an ti zawk a, state inrelbawl dan leh awm dan danglam zelah 1962 khan NEICC tih hi a lo pu ta zawk a ni. Tunah hian motto “One in Christ” (Kristaa pumkhat) tih neiin India hmarchhak kohhran leh ringtute phuar khawm, rawngbawlsak leh zirtir hi a tum ber a ni ta zel a ni. A Office hmunpui hi a tir atangin Shillong, Meghalaya a ni zel a. Tunah hian Office leh Quarters complex changtlung tak neiin a awm mek. Thawh honain hma a sawn zela a lawmawm tak zet a ni.
NEICC hian project hlun pawimawh tak tak a nei thin a. Kum 1952 khan Union Christian Council a din a. He college atang hian mi chhuanawm tak tak an lo zir chhuak tawh thin a. 2016 khan UCC Higher Secondary a din ta bawk. Class XI leh XII hi tun hma chuan College-a Pre University Course tia bet ve kha a ni thin a. Zirna inrelbawlna lo danglam ta zelah a hrana a awm a tul ta a ni. Tichuan kum 2022 khan Peace Centre (Centre for Research, Documentation and Training) tih chu a lo din ta bawk a. Tunah hian Dr Zohmangaihi, Program Coordinator niin hma a la chho mek a ni. NEICC hian a hnuaia kohhrante inrelbawlna ruangam zuiin Hmeichhe pawl (NEICC Women Assembly) tih leh thalai pawl (NEICC Youth Assembly) tih a nei a. Hmeichhia leh thalaite hi anmahni intel hrangin rawngbawlna program chi hrang hrang an nei a. Women Assembly phei hi chuan Shilllongah hmeichhe zirlaite tan hostel an siam a, tha takin an enkawl mek a ni.
Inpumkhatna
Kristian tin nuna ‘Thianghlimna,’ ‘Rinawmna’, te hril a ngai reng ang chian ‘inpumkhatna’ tih pawh hi hril tawp intai awm thei dawn lova ngaih theih a ni awm e. He lui kamah ngat phei hi chuan! ‘Kan inpumkhat tawk tawh,’ tih ngawt theih a ni lo va. Kan phak chin zelah khan Kristaah kan inpumkhat em? tih kan zawh a ngai. Khawvel pum huap Kristian inpumkhatna sawi chang a awm ang a, state pum huap, mahni kohhran pawl chin, tualchhung kohhran chinah…chutiang zel chuan inpumkhat taka kan awm hi a pawimawh nangiang a.
Chutih lai mekin Hmelmapa hian ringtute then darh i thiltum pakhat a ni tih hria ila. Kan inthendarh chuan rawngbawlna a nih ang a ni thei dawn lo tih a chiang a. Chu chu a thlahlel ngawih ngawih a ni. Kan Lalpa khan a hria a niang chu, “Pumkhat an nih theih nan…” tiin a tawngtai lawm lawm a nih kha (Johana 17:20). Kan nihphung rengah ringtute hi maltlat tur kan nih lohzia a chiang a. Mi kan lo hnih thum chuan innghirngho, ngaihdan inang lo leh ro hran neih duhna a lo lian mai thin dawn a ni tih a hmu chiang hle a ni. Chuvang chuan inpumkhatna hi thlarau lam thil a ni tih i hre phawt mai teh ang u.
Mizo Kristiante hi inpumkhat tak kan ni a. Chu chu hmuh tuma kan men chuan harsa lo takin kan hmu thei maiin a rinawm. Kohhran tinin ze hrang tehchiam kan neih loh dan te leh kan thinlung chhung taka Kohhran danga lawi kan thenawmte kan thinhrik lem loh danah hian a lang chiang hle. Kan hotute vei zawng leh kan Pathian Thu tuipui zawng inang deuh thluam thinte hian kan inpumkhatzia a tilang thin.
Chanchin |ha phua awm
Kumin NEICC |awngtai Rual Ni thupui atana NEICC Office lamin a thlan chu Philipi 1:27 tlawhchhanin Chanchin |ha Phua Awm tih a ni a. Tunlai khawvel atana thu pawimawh tak leh ringtute mamawh tlan tak a ni awm e. Chanchin |ha hi kan duhin kan lawm hle a. Mi tam tak chuan kan chhuang viau bawk a ni. Amaherawhchu, Chanchin |ha neitu leh kawltu, hriltu leh lawmtute hian chu Chanchin |ha phu chuan kan nung hlawm em le? Min hretute hian he Chanchin |ha, chanchin zawng zawng zinga hlu ber leh ropui ber phu tawk hian nungin min hria ang em aw?
He thupui innghahna chang lar leh chhiar hlawh tak mai hi Mizo tawnga an dah dan hi a nem hle a. “In awm dan chu Krista Chanchin |ha nen inmawi phawt rawh se,” tiin kan chhiar thin a. Sap tawng Bible chuan ‘matching’ (inmawi, inhmeh) hmang lovin, ‘worthy’ (phu) tih tawngkam a hmang zawk a. “Krista Chanchin |ha phu-in lo nung phawt rawh u,” tih chu hriam tak a ni zawkin a lang. He lehkhathawn ziaktu hian Kristiante nihna hi a la urhsun a, kan nawm kan maka ringtu lo ni ta pawh kan ni lo tih pawm nghet a; Ringtute hi Pathian duhsakna bil dawngtu leh Pathian Thlarau Thianghlim chhinchhiah kan nihzia hriain khawi hmunah pawh Chanchin Tha phu taka nung theuh turin min ti a nih hi i hre thar theuh ang u.
He |awngtai Rual Ni pawimawh tak kan hman niah hian Ringtute tana Inpumkhatna hlutzia thu hian min hneh sela, kan zavai hian Chanchin |ha phua nun pawimawhzia min hriat thar tir mawlh teh se.