Kum 2028-ah chuan Mizoramkawngpui 80% tih that kan tum

• F Rodingliana

Kum 2028-ah chuan Mizoram kawngpui zaa 80 chu siamthat vek tumin hma an la dawn tih minister F Rodingliana chuan a sawi.
Chakma Autonomous District Council Kamalanagar-IV MDC by-election neih turah Thawhtanni khan minister F Rodingliana hian campaign hun tawpna, Kamalanagar-IV a CADC ZPM party buatsaih a hmanpui a. Kum khat leh a chanve chhunga siam tha duak duak tur chuan hun an la nei tlem deuh a. An sawrkar atangin hma an la nghal a, kum 2028-ah chuan Mizoram kawngpui zaa 80 chu siamtha vek turin hma lak tum a ni tih a sawi.
Tripura- Lengpui, Silchar -Aizawl, Aizawl- Lawngtlai leh kawngpui pawimawh dang pawh siamthat vek tum a ni tih a sawi a. ZPM sawrkar chu sawrkar laipuiin a ngaipawimawh a, Power & Electricity department tih changtlunna atan kum khat leh a chanve chhung lekin cheng nuai 16000 a pe tawh niin P&E minister hian a sawi a ni.
Party bil sawi loin kuthnathawktute thlai thar, sawhthing leh hmarcha, hmunphiah an thar chhuah ang ang an lei a, a thar tam apiang an intodelhna turin an lei sak zel dawn tih a sawi. Sawrkar laipui dawr kawngah CM Pu Lalduhoma’n Prime minister chu an sawrkar hun reilote chhung hian tum li leh Union Home minister pawh tum 5 a hmu tawh tih sawiin, “Central ministry hian kan sawrkar hi a ring hle a, mamawh kan thlen pawh min tihsak tam ta hle,” a ti.
MDC by-election neih turah ZPM candidate chu an thlantlin ngei an beisei a, state sawrkar nen insi rem taka hnathawh pui theih tur an thlan thiam a tul hle tiin F Rodingliana hian a chah a ni.