Kum 25 hnua Bayern chhuahsan ve nge nge tawh tur Thomas Mueller

Kum 25 hnua Bayern chhuahsan ve nge nge tawh tur Thomas Mueller
Youth player a nih lai atanga Bayern Munich thuam inbel tawh Thomas Mueller chuan tun season kal lai tawp rual hian kum 25 chhung ngawt a khawsak tawhna Bundesliga giants a chhuahsan ve tawh dawn tih a nemnghet.
Bayern tana record siama league title 12 la tling awmchhun Mueller hi Bundesliga player zinga German top flight title la hnem ber ni nghalin, a club vawn laiah hian la cham chhunzawm duh viau mah se club berin contract thar an zawrh duh ta lo a, a chhuah ve nge nge a lo tul ta a ni.
Kum 35 mi lai ni ve tawh attacking midfielder hian social media kaltlangin thuchhuah a siam a, “Kum heti zat hnuah, minute hei zat khel tawh chung pawh hian he team behchhana khelmual chhunga tal vel hi ka la kham thei chuang lo a, kan team tana title chuh pawh hi ka la inpeih at reng a, nakkum atana la beih chhunzawm pawh inpeih tak ka ni.
“Chutih mek laiin club lamin season thara cham zui leh zel tur zawnga contract thar mi sawipui an tum ta lo a, ka mimal duhdan chuan la inhamtan zel chak mah ila club ngaihdan zawm mai hi a pawimawh zawk lai chu a ni.
“He kawng an thlan tak hi ka zah a, board leh supervisory board lam pawhin he thutlukna hi awlsam leh pawhlah taka an siam a ni lo,” tiin a chhuahna tur kawngka inhawng ve ta chu hreh chung chung pawhin a zawh mai a ngaih ve tak thu a sawi a, a club career chhunzawm zelna tur lam a tarlang tel rih lo thung.
Kum tamtak chhung chu bultantu ni chho ngar ngar mah se a kumte a lo inchherchhuan hnem ve ta a, tunhnai season liamta hnuhnung pahnihah khan coach thar Vincent Kompany hnuaiah khelhna hun leh hmun a lo chang tlem ve ta a; thla engemawzat chhung kha a hmalam hun hian ngaihven a hlawh chungin amah leh club an ngawi tlat a, tunah erawh Mueller ngei a tawngchhuak ta nge nge a, mahse, football hrim hrim chawlhsan lam a hawi dawn em kan thlir chhunzawm ang.
Bayern lam hi chuan an club thuam inbel chung ngeia football khelh a chawlhsan theihna lam hawi tawng an cheh tawh chungin kum June leh July thlaa United States lama Club World Cup hi an club tana a khelh tawpna a nih tur thu bak thu chiang an nei bik rih chuang lo.
Club president Herbert Hainer chuan thuchhuah a siamah, “Bavarian textbook career-ah Thomas Mueller hi thiamna leh a chi (type) zawng pawha entirna duhawm ber a ni a, amah ang reng renga German championship hnehna chang tam an awm lo. A title 33 lak tawh hian chu chu a nemnghet a ni,” tiin a fak.
Career pumpuia club pakhat chauh vuan (one-club player) mi tlemte zinga pakhat niin, chuti ang chu tunlai top football-ah hian hmuh tur an vang tawh em em a ni.
Mueller hian Bayern tan Champions League title pahnih, club World Cup pahnih leh German Cup paruk bakah title dang tam tak a la tawh a; Germany chu 2014 World Cup trophy a lakpui bawk.
Tun season-ah hian title dang lakbelh theihna hun thain a la hmuak mek a, a trophy cabinet-a dahluh belh turin Bayern chuan Bundesliga title race-ah point kuain hma an hruai fal mek a; karleh lam hian Champions League quarter-final lamah Italian club Inter Milan an su zui leh bawk ang.
Kumin Uefa Champions League final hi Munich khawpuia an khelmual ropui Allianz Arena-a khelh tur a ni leh nghal a, Mueller tan a hun tawpa an khelmual hman thiam ngei maia Europe club trophy hlu ber chawi chung ngei maia chawlh chu duhthusam a ni khawp ang le!