Kum 35 chhungin Mizorama forest ram ha.11768 chu non forest-ah lut

On Dec 4, 2025 3 0

Kum 1990 atanga tun thlengin Mizoram-ah forest ram hectare 11,768.8909 a zau chu non- forest area-ah chantir a ni tawh a. Ramngaw tih chhiat a nih avanga sumfaia rulhna Mizoram-in a neih lai chu cheng vaibelchhe 200 chuang a ni.Mizoram CAMPA (Compensatory Afforestation Fund Management and Planning Authority) Governing Body chu an chairman, chief minister Lalduhoma hoin Nilaini khan an thukhawm a. Chairman hian, ramngaw siam thar kawngah chak zawka hma lak a ngai, tiin, “Hnathawhna tur sum kan nei a. Kan ram a lo mawi deuh deuh theihnan kan state tree – Herhse hi uar thei ila, ramngaw siam thei thlai, kuthnathawktute tana tangkai si, rubber ang chite pawh uar ang u,” a ti.
Thenzawl chu Peace City atan master plan siam mek a ni a, rel kawng kalna tur an rawn tichiang thuaiin a rinawm, tiin, “Heng thil hi tihfel a nih hma chu Thenzawlah hma lak rih loh nise, tihchhiat leh mai tur hmalakna kan kalpui palh a hlauhawm,” a ti.
Thutkhawma report danin, kum 1990 atanga kumin thlengin Mizoramah forest ram hectare 11,768.8909 a zau chu non- forest area-ah chantir (divert) a ni tawh a. Heng ramngaw an tihchhiat rulh lehna tur hian hmasawnna hnathawktu (user agency) ten danin a phut angin PARIVESH portal kaltlangin National CAMPA-ah sum an chhunglut thin.
Ramngaw rulhna tur an chhunluh zaa 90 chu National CAMPA hian hnathawhna state Compensatory Afforestation Fund (Public Account) ah dah luh (tranfer) zel a ni a. Tuna Mizoram State Compensatory Afforestation Fund, component hrang hrang belhkhawm awm zat chu Rs. 2,12,15,38,556 a ni.
Chak zawka fund hman dan tur an sawi hoa, Annual Plan of Operations 2024- 2025 hnathawh leh Annual Plan of Operation 2025- 2026 hnathawh mek en a ni. CAMPA work endik hna 3rd party monitoring and evaluation titu Save Environment Association of Mizoram (SENVA) chuan, CAMPA APO 2020- 2021 leh 2021- 2022 hnathawh chu ‘very good’ grade (7.5/10) a pe a ni.
CAMPA fund vil tur finance officer dah tuma bawhzui mek a ni a. Department dang nen project inthuah kalpui a nih lohnan CAMPA project chu Planning department hriattir zel tura tih a nih bakah project lian leh pawimawh bik chu chairman hoa en tura tih a ni.