Kum 4 chawlh hnuah Mualkhang Bottling Plant tharthawh dawn ta

Kum 2020 atanga tihtawp Mualkhang LPG Bottling Plant chu sawrkar hmalakna kal zelah tharthawh leh a ni dawn.Kum 2006-a bul tan tawh Mualkhang Bottling Plant hi Oil Industry Safety Directorate-in safety norms a siama atanga a tlin tawk lohna hmuh a nih avangin January 2020 khan tih tawp a ni a. Mizoram sawrkar leh Indian Oil Corporation Limited tangdunin a hma aia lian zawka tharthawh tumin hma an la a; kum 2021 khan ram hectare 2-a zau leiin IOCL hnena hlan a ni.
Ruahman ang chuan Mualkhang Bottling Plant ding lai hi thiah a, OISD 144 design mila a thar sakthat tur a ni a. Hemi atan hian IOCL chuan cheng vaibelchhe 225.71 chu kumin July 4 khan a sanction fel. Sanctioned order hi Supply minister B Lalchhanzova kutah July 22 khan IOLC deputy general manager (LPG- Engineering) Z Lumding chuan a hlan a ni.
IOCL hotute sawi danin, chief minister Pu Lalduhoma leh Food Civil Supplies & Consumer Affairs minister Pu B Lalchhanzova ten theihtawpa hma an lakpuina rah a ni a. Chief minister-in IOCL chairman hnenah Mualkhang Bottling Plant sakthat a nih theih nana biak ngaite a biak bakah Land Revenue & Settlement changtu ni bawk FCS&CA minister hian Bottling Plant ram mamawh atan land lease renew leh ram mawmah belh atan land lease extension rang takin a tihfel sak bakah hna tan thuai a nih theih nana compensatory afforestation tur ram rang takin a hmuhsak a ni tih an sawi.
Mualkhang Bottling Plant hi zawh a nih hun chuan 30000 metric ton per annum (30 TMTPA), ni khata gas cylinder bur 7000 vel pe chhuak theia duan a ni dawn a. A hmunah hian metric tonne 900 (bur 63300) vel chhekkhawl theihna a awm nghal ang. Khuarel chhiatna leh chhan hrang hrang vanga inkalpawhna buai thulhah pawh eirawngbawlna gas buaina awm thin chu ni 9-10 chhung mamawh a dahkhawl theih dawn a ni.
Mualkhang LPG Bottling Plant hian Oil Industry Safety Directorate Standard 169 zawm tura duanah, kum 5 dan zela endik thin a ni a. Endik hnuhnung berah standard 169-in a phut ang, hmun thenkhata kang thelhna (automated fire hydrant) mumal tak siam, Plant huamchhung felfai taka hung, khawl lian bunna hrang hrangah lirthei luhchhuahna tha tak hmun hnih zela siam leh, LPG dahkhawlna bur lian (bullet tank) chu chhan hrang hrang avanga hmun thenkhatah a chhah dan tur ang a phak tawh loh avangin 2020 January 16 atang khan chawlh lailawk a ni.