Kum 70 hnuah Newcastle United an champion

Pathianni zan khan England-a khelmual ropui ber Wembley Stadium-a English Carabao Cup final khelh a ni a. Newcastle United chuan Liverpool lakah hnehna ropui an chang a, kum 70 zet hnuah trophy lian an chawi.
Wembley Stadium-a final hmuhnawm takah Liverpool in manager thar Arne Slot hnuaia a vawi khat nan champion tumin tan an khawh a. An trophy lak theih hnai ber hi lak ngei tumin tan an khawh nasa hle. Liverpool in Carabao Cup champion ngun ber an nihna tihpun an tum laiin Newcastle United in kum 70 zet hnuah a vawi khat nan champion tumin tan an khawh ve bawk. Final-ah champion chaka tuihal nasa zawk Newcastle an khel tha a, chak phuin an inlan. Hun tawp dawn hnaiah Liverpool in goal thun ve bawk mah se tlawm an pumpelh thei ta chuang lo.
Final hmuhnawm takah hian goal lut a awm theih lawk loh hnuin defender palian Dan Burn chuan corner atanga ball kal chu minute 445-naah a tauh goal a. He goal hmang hian si khat faia hmahruai chungin chawlhlawk an hmang.
Chawlhlawk hnu lamah Newcatle an khel tha chhunzawm a, goal an thun belh leh thuai. Minute 52-na lekah Liverpool in lak tuma an hel mek Alexander Isak chuan Jacob Murphy siamsak atangin an goal hnihna a thun a, an hmahruaina a tizau. Team lian Liverpool lakah hian si hnih faiin hma an hruai reng a, hun pangngaiah goal an chhuah vangin Magpies hi champion turin an dinhmun a tha hman hle. Hun pangngaiah goal thun thei lo mah se hun pek belh minute 90+4-ah Federico Chiesa chuan goal thunin an si phurh a sut then a, Liverpool beiseina thar a siamsak. Chiesa goal thun vanga phur thar hluai Liverpool hian tlawm pumpelh ngei tumin tan khawh bawk mah se goal an thun belh thei tawh lova, Newcastle United lakah uiawm taka tlawmin, an champion zo ta a lo a ni.
Team lian Liverpool lakah an chak nawlh vangin Newcastle United hian kum 70 zet hnuah trophy lian an chawi ve ta nge nge. Newcastle United hi kum 1955 khan FA Cup-ah an champion a. Hemi hnu hian inelna hrang hrangah an champion thei ta lo ngar ngar a. Kum 2025 a lo inherchhuah meuh chuan EPL-a khel tha tak Liverpool hnehin an champion ve leh ta nawlh a, kum 70 zet an lo nghah tawh trophy chu an nghakchhuak ve ta nge nge. Carabao Cup-a champion puitu manager Eddie Howe hi Harry Redknapp hnu lamah English manager zinga club enkawl champion pui leh thei hmasa ber a ni. Harry Redknapp hian kum 2008 khan Portsmouth chu FA Cup-ah a champion pui a. Kum 16 chhung zet English manager ten an club enkawl an champion pui theih loh hnuin Eddie Howe a rawn lang ve leh ta nawlh a ni.
Uiawm taka champion zo ta lo Liverpool hi manager thar Arne Slot hnuaiah an khel tha chho viau a, trophy pathum lak theih beiseina sang tak an nei hman hial. Champions League-ah PSG lakah vanduaiin quarter-final an paltlang zo lova, Carabao Cup final-ah an tlawm zui leh bawk. EPL-ah point 12 in hma an la hruai a, champion theihna hun tha tak an nei mek. EPL-ah champion ngei tumin tan an khawh zui dawn a, an champion thei a nih chuan Jurgen Klopp thlaktu Arne Slot tan bul tanna chhiah a ni hran lo ang. Tunhnaiah result an neih that loh vangi EPL lamah an tan viau a ngai thung ang.