Kum 71 nghah hnuah French rider chak ve ta hlawl!

Kum 71 nghah hnuah French rider chak ve ta hlawl!
MotoGP French Grand Prix-ah khuan kum 1954 hnu lamah tualchhung rider-te an chak leh thei ta reng reng lo a, Pathianni khan chu lung bang suttlang harsa zet chu LCR Honda rider Johann Zarco chuan a rawn thiat ta hlawl a, kum 71 zet an nghah hnuah French supporter-te’n an kawtkai ngeia a ram mi hnehna chang lai an hmu leh thei ta a ni.
Reims khaw tlan- kawnga kum 70 chuang kaltaa pakhatna Pierre Monneret kha an home GP-a French winner hnuhnungber a ni rei ngat ngat khawp mai a, French Grand Prix-a ram dang rider chak lai an thlir kumtin kumkhua dawn ta emaw tih hnuah Zarco a rawn lang ve leh ta hlawl a ni!
Tunhma lam MotoGP intlansiaka Zarco chak awmchhun chu kum 2023 Australia ram hnehna kha niin, Le Mans tlankawng huh hnuaia a rawn chetfuh leh chhanah hian wet tyres hmang chunga bul a rawn tan kha a kawh theih ang.
Kum 34 mi Zarco hian an ram tlankawngah 11-na atanga tlanchhuakin, chu tah hmasawn lo zawnga khawsain 17-naah a tlahniam hman a, mahse, lap eight-ah hma a rawn hruai hman a, hawikir tawh loin a hmahruaina a chhunzawm ngar ngar a, amah hnaihbertu championship leader Marc Marquez aiin second 20 dawnin a thleng hmasa ta hial a ni!
Kum 30 chuang lai ni tawh chunga inlan Zarco kha Pathianni intlansiak zinga rider upa ber niin, a career-a hnehna a chan vawihnihna kha a mi deh a na deuhte a ni bawk a, a pa pawh mittui nen lawm avangin a insum zo bik lo.
Pathianni intlansiak en tura a hmuna pungkhawm mipui 120,000 chuangin an chipui rider hming an lam rual dual dual a; hnehna lawmin mipui tlim hmur hmaah Zarco pawh a la inbin (backflip) zak zak bawk!
An kawmnaah Zarco chuan a hun tawn kha awih harsa a tih thu leh thil thleng pawh a hriatthiam teh nuai loh thu a sawi zet a, “Lap hnuhnung lam kha rei hi ka han ti khawp a, hnehna ka chang zui ta mai kha magic a ni ringawt.
“A tir lama rain tyres kan hman avangin bike thunun a awlsam phah a, ka hnungah Marc kha rawn vung viau bawk mah se kan inkar awl ka thunun thei hlauh a, wow! a ni tawp mai,” a ti.
Spaniard Marquez pawhin intlansiak mak tak a nih thu leh a tir lam boruak chu a rin loh dan deuh a nih zual thu sawi chungin, “Vawiin zet chu kei aiin Johann a chak zawk a ni,” tiin tualchhung rider laka a tlawm thu a puang.
Ducati rider Marquez hian Inrinni sprint race-ah hnehna changin, a tuk, Pathiannia intlansiak pui ber (main race)-ah pawh rinkai a ni zui leh ngei a, mahse, tualchhung tlangval Zarco a hmakhalh zo ta lo a, mahse, rider standing-ah a nau Alex hmakhalhin hma a hruaikir leh ta tho a, point 22 laiin a fal zui ta bawk.
Vawiruk ngawt world champion ni tawh Marquez hnung chiahah hian Gresini Racing rookie Fermin Aldeguer chu pathumna niin a thleng a, a career-a a vawikhatna atan MotoGP podium a lawn ve ta bawk.
Le Mans tlankawnga Zarco a rawn chak nawlh avang khan intlansiak hnuhnung vawi 22 tehreng chak zawn mek Ducati chak tluang lai a tawp ta rih a; home fans hmaa a point thawhchhuah hmangin LCR Honda rider khan overall standing-ah parukna a luah chho a, a chipui Fabio Quartararo hma chiahah a ding.
2021 world champion Quartararo kha Pathianni race-ah pole position atanga tlanchhuak tur a nih avangin home hero nih a tum hlein a rinawm a, mahse, lap four final corner-ah chesualin a tlan chhunzawm thei ta lo hlaih a ni.
Intlansiak zawh dawn hnaih lamah pathumna luah mek Alex Marquez pawh tlan zawm thei lo zingah telin, standing lama a hmahruaina pawh a hloh phah ta hial a ni.
Tarlan tak angin, kartawp Le Mans intlansiak en tur khan French mipui an chhuak khawm nasa hle a, tun kha MotoGP era-a France rama bike intlansiak level sang ber a hmuna thlir tura supporter an punkhawm hnem ber tum niin, kartawp pumpuia fans pungkhawm zat kha 300,000 an tling hial a ni!