Kum dang aiin April-June a lum dawn – IMD

Kum dang aiin April-June a lum dawn – IMD
India chuan April leh June inkar hian a nih dan thin pangngai aia khaw lum a tawng dawn a, ram laili, khawchhak leh hmarthlang phaizawkte chuan lum uchuak ni tam zawk a tawng dawn niin India Meteorological Department (IMD) chuan Thawhtanni khan a sawi.
Khaw lum lam sang zual tur hian tui indaih lohna leh air conditioner hman nasat avanga power-a indaih lohna a thlen theih rin a ni.
IMD Director General Mrutyunjay Mohapatra chuan hmun tam takin khaw lum uchuak ni an tawng dawn tih a sawi a. “April leh June inkarah hian hmar leh khawchhak hmun tam tak, laili leh hmarthlang phaizawk chuan a nih dan pangngai thin aia khaw lum ni hnih atanga ni li vel an neih belh dawn,” a ti.
Khawthlang leh khawchhak lam tih loh chuan India ram hmun tam takin April thla hian a lum ber hun an tawng dawn niin a sawi a. A vawh ber hun lai pawh hmun tam zawkah chuan a nih dan pangngai aiin a sang dawn niin a sawi.
A nih dan thin pangngaiah chuan April leh June inkarah hian India-ah hian khaw lum uchuak ni hi ni li atanga ni sarih inkar vel a awm thin.
IMD hotu sang chuan India hmarthlang lam chuan a nih dan pangngaia khaw lum uchuak ni ni nga/ni ruk vel nei thin chu a leta tam an nei dawn niin a sawi.
Rajasthan, Gujarat, Haryana, Punjab, Madhya Pradesh, Maharashtra, Uttar Pradesh, Bihar, Jharkhand, West Bengal, Odisha, Chhattisgarh, Telangana, Andhra Pradesh leh Karnataka hmarchhak leh Tamil Nadu-ah a lum dan pangngai baka lum a awm dawn tih a sawi.
April thlaah hian ram pum deuhthawah khaw lum ber lai chu a nih dan pangngai aia lum a ni dawn a. Chhimtawp leh hmarthlang hmun thenkhat deuh chauh a nih dan pangngai ang a ni dawn.
Mohapatra chuan a vawh ber lai pawh hmun tam zawkah a nih dan pangngai aiin a sang dawn tih a sawi lawk a. Hmarthlang hmun thenkhat leh hmarchhakah erawh a nih dan thin pangngai leh a aia vawt pawh a ni thei tih a sawi.
News agency PTI chuan mi thiamten India hi nipui hun atan electric a mamawh zat chu 9-10% velin a pung dawn a, chumi tur chuan a inbuatsaih a ngai niin an sawi tih a tar lang.
Kum 2023 khan electricity mamawh san ni ber, May 30 khan gigawatts (GW) 250 mamawh niin mamawh tura chhut lawk aiin 6.3%-in as ang zawk.
March thla liam ta pawh kha kum dang aia lum tura chhut lawk niin wheat seng a tihbuai rin a ni a. Thar chhuah a tlem chuan sorkarin ram dang atanga a lak luh hial a ngaih rin a ni.
India hian kum 2022 atang khan March thlaah khua a lum nasat thin avangin wheat thawn chhuah hi a lo khap tawh a, a man pawh a thunun bawk.
Khua a lum hian power awm lo veng turin power plant-a lungalhthei hman pawh a pun ngei rin a ni a. Power supply khaihlak hi khaw lum uchuakah miin intihdaihna tur an neih loh phah a, khaw lum kaihhnawih damlo an pun phah thin.