Kum hnih chhungin mi nuai 3.3 ILP pe

Tun hnai kum hnih, 2024 leh 2025 khan Mizoram sorkarin mi nuai 3.3 hnenah ILP a pe a, a tam zawk fe chu temporary ILP a ni.Budget Session neih mekah Lawngtlai West bialtu C Ngunlianchunga zawhna, ziaka chhan chi chhangin home minister K Sapdanga’n kum hnih chhunga ILP pek zat hi House a hrilh a, 2024-ah mi 1,59,608 hnenah ILP pek a nih thu leh 2025-ah mi 1,80,384 te pek a nih thu a sawi.
2024 leh 2025 chhunga ILP pek chhuah atanga sum hmuh zat chu Rs 15,12,41,725 a nih thu a sawi bawk.
Home minister-in a sawi danin, kum hnih chhunga ILP pek hi temporary ILP mi 3,17,807 leh regular ILP 22,185 a ni.
ILP pek chhuah tam berna chu Kolasib a ni a, 2024-ah temporary ILP 99,513 leh regular ILP 1,469 pek niin, 2025-ah temporary ILP 88,038 leh regular ILP 1,508 pek a ni.
Lengpui-ah pek chhuah a tam bawk a, 2024 khan temporary ILP 23,075 pek niin, 2025-ah 23,407 pek a ni. Kum hnih chhung hian Lengpuiah hian regular ILP pek a ni lo.
Aizawl SP atanga pek chhuah a pung nasa a, 2024-ah temporary ILP pek a awm loh laiin 2025-ah chuan 20,314 pek a ni.