Kum kal mekah beng ri hriatna tha lo 4750 hmuchhuak tawh
Kum kal mekah beng ri hriatna
tha lo 4750 hmuchhuak tawh
Kum kal mek, April 2025 atanga January 2026 thleng khan Mizoramah beng natna nei/ beng ri hriatna thalo nei 4750 hmuhchhuah an ni tawh.
Ri Hriatna Ni (World Hearing Day) chu Mizoram-ah a vawi 11-na atan Thawhlehni khan Aizawlah hman a ni a. Persons with Disabilities commissioner Vanlaldiki’n a hmanpui.
World Health Organisation-in a zirchiannaah ri hriatna thalo hi kan thil hriatna (sensory organs) 5 zinga piansualnaah a tam ber a. Tunah hian khawvel pumah mihring tluklehdingawn 1.5 velin ri hriatna chaklo an nei a, heng zinga maktaduai 430 chu an beng a ngawng. Tun ang zela kan kal chuan kum 2050-ah chuan mi 10 ah 1 zel an beng a ngawng dawna chhut a ni. Hei vang hian kan beng hi kan enkawl uluk a, bengngawnna thlentu hrang hrang laka kan inven fimkhur a ngai hle, tih sawi a ni a. Beng natna chi hrang hrang bakah damdawi beng ri hriatna chaklo thlen thei lakah leh ri bengchheng nasa laka inthiarfihlim a pawimawh tih sawi a ni.
He mi kawnga hma la tur hian National Programme for Prevention and Control of Deafness (NPPCD) chu 2014 August atang khan Mizoramah National Health Mission hnuaia din a ni a. Sawrkar kum kal mek (April 2025 – January 2026) thlenga chhinchhiah danin Mizoramah beng lama insawiselna nei mi 31735 en niin, beng natna emaw beng ri hriatna thalo nei 4750 hmuhchhuah tawh an ni a, mi 222 chu beng thalo vanga zai an ni tawh bawk. Hei bakah hian mi 1541 chu bengdar dawng tur leh speech therapy tul ang ti tura refer an ni.
India ramah NPPCD Mizoram hi hma la tha ber pawl a ni mek a. Hemi kawngah hian RBSK (Rashtriya Bal Swasthya Karyakram), Ephatha Society, Ephatha Special School for the Deaf and Hard of Hearing College Veng leh Redeem Garden Durtlang thawhpui an ni a. NILD – NERC (National Institute for Locomotor Disorder – North Eastern Regional Council), ALIMCO leh AYJNISHD (D) Bhubaneshwar nen bengdar sem kawngah an thawkho mek bawk. ALIMCO leh NPPCD tangdun hian Zoram Medical College & Hospital Falkawnah sawrkar kum kal mekah a mamawhtute hnenah bengdar 108 an sem tawh a ni.
World Hearing Day hi kum 2007 atang khan kumtin hman thin a ni a, kumin hi khawvel huapa an hman vawi 19-na a ni. He ni hmanin a tum ber chu, ri hriatna thalote harsatna hriatthiam pui tur leh ri hriatna thalo titlem tura mipui hnena zirtirna zau zawka thehdarh a ni. Hei baka mipui hriat tur pawimawh chu, a hma thei ang bera beng natna hmuhchhuaha enkawl hma hian bengngawnna a thlen tur nasa takin a veng thei, tih a ni.
Hun hmanah hian Dr Rita Zoramthari chuan kumin thupui “From communities to classrooms: hearing care for all children” (Khawtlang atanga naupangte thlengin: ri hriatna tha nei tura naupangte enkawl) tih hmangin thu a sawi a ni.