Kum kalta chhungin jail
tang tlangchhuak 11 awm
Sawrkar kum thar kan chuangkai tan a, sawrkar kum kalta chhung khan jail tang tlanchhuak mi 11 an awm a, an zinga 5 chu man an ni tawh.
Tunhnaia Assembly Session neih zawh takah zawhna chhangin Home minister K Sapdanga chuan, zawhna siam lai, (February 2025 thleng vel) khan 2024- 2025 chhungin jail tang tlanchhuak 8 an awm a, 2 man leh tawh niin 6 dang man loh an la awm tih a sawi.
Session zawh hnu hian hriat theih chinah jail tang tlanchhuak 3 an awm belh a, man leh nghal vek niin, hemi nena belhin sawrkar kum kal liam chiah taah hian jail tang tlanchhuak 11 an awm a, an zinga 5 chu man tawh niin, 6 dang man loh an la awm tihna a ni.
Kolasib District Jail tang, damlohna avanga Kolasib District Hospital-a enkawl lai Seikholen Khongsai chu March 29 zan khan damdawi in atang hian a tlanchhuak. Kolasib Police-in ngawrh taka zawng nghalin, March 30 zan khan Silchar-ah an man a ni. Amah hi 2024 August 21-a Kolasib Police leh Sub-Hqrs YMA Kolasib Kumpuan duty ten Sethawn bulah heroin kawl avangin man a ni.
March 27 chawhnu dar 3.00 vel khan Mamit District Jail atangin mi pahnih – Alex R Vanlalhruaia (30) Chhinga Veng Aizawl leh Malsawmlawmpuia (25) Bazarveng Mamit chu tlanchhuakin, jail compound chhunga bike pakhat an ru nghal a. March 28 zing dar 1.30 velah Malsawmlawmpuia hi Mamitah man leh a ni a, a tlanchhuahpui pa pawh hi Mamitah vek March 28 chawhma lam khan an man a ni. Jail complex atanga bike an ruk bakah bike dang pakhat an lo ruk hman bakah midang nen in an lo rawk hman nia thu dawn a ni.
Alex R Vanlalhruaia hi in rawk vanga kum 2023-a man, kum hnih leh thla hnih tang tura convict a ni a; Malsawmlawmpuia hi rukruk avanga kum 2024-a man, thla ruk chhung tang tura convict a ni.
Kum kalta chhungin jail tang tlangchhuak 11 awm
Get real time updates directly on you device, subscribe now.